മലപ്പുറം: ഓണാഘോഷത്തിനോടനുബന്ധിച്ച് മലപ്പുറത്ത് വിൽപ്പനയ്ക്കെത്തിച്ച 65 ഗ്രാം എം ഡി എം എയും എട്ട് കിലോ കഞ്ചാവും പിടികൂടി. സംഭവത്തിൽ മണ്ണാർക്കാട് തച്ചംമ്പാറ സ്വദേശി മണ്ണേത്ത് യൂസുഫ് (63), അലനല്ലൂർ കാട്ടുകുളം സ്വദേശി അമീർ (21), താമരശ്ശേരി പൂനൂർ സ്വദേശി ആലപ്പടിക്കൽ മുഹമ്മദ് റിയാസ് (33) എന്നിവർ അറസ്റ്റിലായി.
കഴിഞ്ഞ ദിവസം രാത്രി എട്ടരയോടെ പെരിന്തൽമണ്ണയ്ക്കടുത്ത് മാട് റോഡിൽ കുന്നുംപുറത്ത് നടത്തിയ വാഹന പരിശോധനയിൽ ഓട്ടോയിൽ ഒളിപ്പിച്ച് കടത്തിയ രണ്ട് കിലോഗ്രാം കഞ്ചാവുമായാണ് മണ്ണാർക്കാട് മണ്ണേത്ത് യൂസുഫി(63)നെ അറസ്റ്റ് ചെയ്തത്. പെരിന്തൽമണ്ണ ടൗണിൽ വെച്ചാണ് 65 ഗ്രാം ക്രിസ്റ്റൽ എം ഡി എം എയുമായി അലനെല്ലൂർ കാട്ടുക്കുളം സ്വദേശി പാലപ്പുറത്ത് അമീർ (21) പിടിയിലായത്. പാലക്കാട് ഹൈവേയിൽ പാതായ്ക്കര വെച്ചാണ് കാറിൽ കടത്തുകയായിരുന്ന ആറ് കിലോഗ്രാം കഞ്ചാവുമായി താമരശ്ശേരി പൂനൂർ സ്വദേശി ആലപ്പടിക്കൽ മുഹമ്മദ് റിയാസി(33)നെ അറസ്റ്റ് ചെയ്തത്. ഇയാൾ സഞ്ചരിച്ച കാർ കസ്റ്റഡിയിലെടുത്തു. പ്രതികളെ കോടതിയിൽ ഹാജരാക്കി.
പെരിന്തൽമണ്ണ ഡി വൈ എസ് പി. എം സന്തോഷ് കുമാറിന്റെ നേതൃത്വത്തിലുള്ള പോലീസ് സംഘം ഓരാഴ്ചയോളം നടത്തിയ അന്വേഷണത്തിനൊടുവിലാണ് പ്രതികൾ പിടിയിലായത്. ഓണത്തിനോടനുബന്ധിച്ച് ജില്ലാ- സംസ്ഥാന അതിർത്തികളിൽ പരിശോധന ശക്തമാക്കാനാണ് പോലീസിന്റെ തീരുമാനം.
Comments