തിരുവനന്തപുരം: നിയമന കത്ത് വിവാദത്തിലും ചാൻസലർ സ്ഥാനത്തു നിന്ന് ഗവർണർ ആരിഫ് മുഹമ്മദ് ഖാനെ മാറ്റാൻ സർക്കാർ ഓർഡിനൻസ് പാസാക്കിയതിനെയും പരിഹസിച്ച് രാഷ്ട്രീയ നിരീക്ഷകൻ ശ്രീജിത്ത് പണിക്കർ. ‘ഒരു വ്യാജകത്ത്’ എന്ന പേരിൽ കത്തെഴുതി കൊണ്ടാണ് പിണറായി സർക്കാരിനെ ശ്രീജിത്ത് പണിക്കർ ട്രോളിയിരിക്കുന്നത്. വളരെ രസകരമാണ് കത്തിന്റെ ഉള്ളടക്കം. ആര്യാ രാജേന്ദ്രൻ എന്നതിന് പകരം സൂര്യ രാമേന്ദ്രൻ എന്നും ജില്ലാ സെക്രട്ടറി ആനാവൂർ നാഗപ്പന് പകരം ഒരു പാമ്പിന്റെ ചിത്രവുമാണ് കത്തിൽ നൽകിയിരിക്കുന്നത്.
ഒഴിവുകൾ ഉള്ള തസ്തികകളായി കത്തിൽ സൂചിപ്പിക്കുന്നത് ‘ഗവർണർ’, ‘ചാൻസലർ’ എന്നീ പദവികളാണ്. ഗവർണർ തസ്തികയിൽ ‘ആൾക്കാരോട് നല്ല മേഴ്സി ഉള്ളവർക്ക് പരിഗണന’ എന്നും ചാൻസലർ തസ്തികയിൽ ‘മേശമേൽ താണ്ഡവം നടത്തുന്ന കലാകാരന്മാർക്ക് പരിഗണന’ എന്നുമാണ് പരിഹസിച്ചു കൊണ്ട് കുറിച്ചിരിക്കുന്നത്.
അവസാന തിയതിയുടെ സ്ഥാനത്ത് സഖാവിന്റെ ഇഷ്ടം എന്ന് എഴുതിയിരിക്കുന്നു. അപേക്ഷ അയക്കേണ്ട സൈറ്റ് എന്നുള്ളിടത്ത് ‘WWW.nokkiyirunnoippokkittu.com'(നോക്കിയിരുന്നോ ഇപ്പോ കിട്ടും) എന്നാണ് പരിഹസിച്ചു കൊണ്ട് കൊടുത്തിരിക്കുന്നത്. കത്തിന്റെ കോപ്പി അയച്ചിരിക്കുന്ന വിലാസവും വായനക്കാരിൽ ചിരി പടർത്തുകയാണ്. ‘ഇരട്ടശങ്കൻ, ക്യൂബള ക്രൈംബ്രാഞ്ച്, ഫോറൻസിക് ലാബ്’ എന്നാണ് വിലാസം നൽകിയിരിക്കുന്നത്. സർക്കാരിനെയും മേയറിനെയും പരിഹസിച്ചു കൊണ്ട് ശ്രീജിത്ത് പണിക്കർ എഴുതിയ കത്ത്, ഇപ്പോൾ സമൂഹമാദ്ധ്യമങ്ങളിൽ ചിരിപടർത്തുകയാണ്.
Comments