ഭോപാൽ: ടെഡ്ഡി ബിയറിനെ പോലെ രണ്ട് മാസം പ്രായമുള്ള കുഞ്ഞിനെ കുളിപ്പിക്കാൻ ശ്രമിച്ചതിന് പിന്നാലെ ബക്കറ്റിൽ വീണ് കുഞ്ഞിന് ദാരുണാന്ത്യം. മധ്യപ്രദേശിലെ നർമദാപുരം ജില്ലയിലാണ് സംഭവം. നാലും ആറും വയസുള്ള സഹോദരിമാരാണ് കുഞ്ഞിനെ കുളിപ്പിച്ചത്. ഇതിനിടെയിലാണ് കുഞ്ഞ് ബക്കറ്റിൽ വീണ് മരണപ്പെട്ടത്.
കഴിഞ്ഞ ദിവസമാണ് സംഭവം. മരണത്തിൽ ഭിക്ഷക്കാരിയെ ഉൾപ്പെടെ സംശയിച്ചിരുന്നെങ്കിലും കുഞ്ഞിന്റെ മരണവുമായി ബന്ധപ്പെട്ട് മറ്റ് ദുരൂഹതകളൊന്നുമില്ലെന്നും സഹോദരിമാർ നടന്ന സംഭവം തുറന്നുപറഞ്ഞതായും പോലീസ് അറിയിച്ചു. സംഭവദിവസം ഒരു ഭിക്ഷക്കാരി വീട്ടിൽ എത്തിയിരുന്നു. അതിനാൽ ഇവർ കുഞ്ഞിനെ എടുത്തുകൊണ്ടുപോയോ എന്നതായിരുന്നു വീട്ടുകാരുടെ സംശയം. എന്നാൽ ഇതിനിടെയിലാണ് വീട്ടിലം കുളിമുറിയിലെ ബക്കറ്റിൽ കുഞ്ഞിനെ മരിച്ചനിലയിൽ കണ്ടെത്തിയത്.
കുഞ്ഞിനെ കാണാതായതോടെ മാതാപിതാക്കൾ ഏറെനേരം തിരച്ചിൽ നടത്തിയിരുന്നു. പിന്നീടാണ് കുളിമുറിയിൽ കണ്ടെത്തിയത്. മരണത്തിൽ ദുരൂഹതയുണ്ടെന്ന ആരോപണമുയർന്നതോടെയാണ് പോലീസ് വിശദമായി അന്വേഷണം നടത്തിയത്. ഇതിന്റെ ഭാഗമായി നാലും ആറും വയസ്സുള്ള സഹോദരിമാരിൽ നിന്നും പോലീസ് വിവരങ്ങൾ ചോദിച്ചിരുന്നു. ഇതോടെയാണ് സഹോദരിമാരുടെ കൈയിൽ നിന്നാണ് കുഞ്ഞിന് അപകടം സംഭവിച്ചതെന്ന് വ്യക്തമായത്.
സഹോദരിമാർ ടെഡ്ഡി ബിയറിനെ ഉപയോഗിച്ചാണ് കളിച്ചിരുന്നത്. തുടർന്ന് ഇരുവരും ടെഡ്ഡി ബിയറിനെ കുളിപ്പിക്കുകയും ഉണക്കാൻ വെയ്‌ക്കുകയും ചെയ്തു. ഇതിന് പിന്നാലെയാണ് രണ്ട് മാസം പ്രായമുള്ള സഹോദരിയയെയും ഇതുപോലെ കുളിപ്പിക്കാമെന്ന് ഇവർക്ക് തോന്നിയത്. തുടർന്നാണ് കുഞ്ഞിനെ എടുത്ത് കുളിമുറിയിൽ വന്നത്. വലിയ ബക്കറ്റിന്റെ അരികിൽ ഇരുത്തിയാണ് കുഞ്ഞിനെ കുളിപ്പിച്ചത്. തുടർന്ന് വഴുതി ബക്കറ്റിലെ വെള്ളത്തിലേക്ക് വീഴുകയായിരുന്നു. പരിഭ്രാന്തരായ സഹോദരിമാർ കുഞ്ഞിനെ പുറത്തെടുക്കാൻ ശ്രമിച്ചെങ്കിലും കഴിഞ്ഞില്ല. പിന്നീട് ബക്കറ്റ് അടച്ച് ഇരുവരും പുറത്തേക്ക് പോവുകയായിരുന്നു.
