കൗബോയ് ചിത്രങ്ങളിൽ മാത്രം കണ്ടു വന്നിരുന്ന ഒരു മേക്കിംഗ് സ്റ്റൈലും പശ്ചാത്തല സംഗീതവും വസ്ത്രധാരണവുമെല്ലാം മലയാള സിനിമകളിൽ കൊണ്ടുവന്നത് സംവിധായകൻ ജയരാജാണ്. അദ്ദേഹം സംവിധാനം ചെയ്ത ജോണി വാക്കറും ഹൈവേയുമെല്ലാം മലയാളികളുടെ ഇഷ്ട ചിത്രങ്ങളാണ്. കാലം കഴിയും തോറും വീര്യം കൂടുന്ന സിനിമകൾ. ആ രണ്ട് സൂപ്പർ ചിത്രങ്ങളുടെയും രണ്ടാം ഭാഗത്തിന്റെ കഥ റെഡിയാണെന്ന് വെളിപ്പെടുത്തിയിരിക്കുകയാണ് ജയരാജ്. കാഥികൻ എന്ന സിനിമയുടെ പ്രമോഷന്റെ ഭാഗമായി ഒരു ഓൺലൈൻ മീഡിയയ്‌ക്ക് നൽകിയ അഭിമുഖത്തിലാണ് സംവിധായകൻ ഇക്കാര്യം തുറന്നു പറഞ്ഞത്.
“ലാലിനെ ജോണി വാക്കറിന് വിളിച്ചതാണ്. അതിലെ സ്വാമി എന്നുള്ള ക്യാരക്ടറിന് വേണ്ടിയാണ് ലാലിനെ വിളിച്ചത്. അപ്പോൾ ലാൽ ഓടി. ഞാനൊന്നും ഇല്ല, വേറെ പണി വല്ലോം നോക്കാൻ പറഞ്ഞു. പിന്നെ കളിയാട്ടം വന്നപ്പോൾ ഞാൻ വീണ്ടും വിളിച്ചു. സിദ്ദിഖ് പറഞ്ഞ് മനസിലാക്കിയ ശേഷമാണ് ലാൽ അഭിനയിക്കുന്നത്. എന്നിട്ടും അതിൽ അഭിനയിക്കുമ്പോൾ ലാലിന് ശകലം പോലും കോൺഫിഡൻസ് ഉണ്ടായിരുന്നില്ല. പക്ഷെ, ഇപ്പോൾ നോക്കിയാലും ലാലിന്റെ ഏറ്റവും നല്ല സിനിമ കളിയാട്ടമാണ്.
വീണ്ടും സ്റ്റൈലിഷായുള്ള സിനിമകൾ പ്രതീക്ഷിക്കാം. ഒരേതരത്തിൽ റിയലസ്റ്റിക് സിനിമകൾ ചെയ്ത് ബോറടിച്ചു. അതുകൊണ്ടാണ് ഹൈവേ 2 പ്രഖ്യാപിച്ചത്. എല്ലാം ഒരുക്കി വന്നതാണ്, കാസ്റ്റിംഗ് കോളും ചെയ്തതാണ്. പക്ഷെ, ചില ടെക്നിക്കൽ കാരണങ്ങൾ കൊണ്ട് മാറ്റി വച്ചു. ജോണി വാക്കർ 2 ചെയ്യാൻ വേണ്ടി മമ്മൂക്കയോടും ദുൽഖറോടും പറഞ്ഞു. അതിന്റെ കഥയൊക്കെ എല്ലാം റെഡിയാണ്. അത് ഹിറ്റായിരിക്കുമെന്നും ഉറപ്പാണ്.
ഒരു ഹിറ്റ് ചിത്രം എന്ന തരത്തിലാണ് ജോണി വാക്കർ 2-നെ പ്ലെയ്സ് ചെയ്തിരിക്കുന്നത്. എന്നാൽ, മമ്മൂക്കയ്‌ക്കും ദുൽഖറിനും അത്ര താത്പര്യമില്ല. അതുകൊണ്ട് അതും തത്കാലം മാറ്റി വച്ചു, ഉപേക്ഷിച്ചിട്ടില്ല. നമ്മൾ നമ്മളിലുള്ള യുവത്വത്തെ ഉപേക്ഷിച്ചിട്ടില്ല. പുതിയ തലമുറയുടെ ടേസ്റ്റ് എന്താണെന്ന് ഞാൻ എപ്പോഴും നോക്കി വയ്‌ക്കാറുണ്ട്. അതുകൊണ്ടാണ് തൊണ്ണൂറുകളിൽ ഇറങ്ങിയ ജോണി വാക്കർ ഇപ്പോഴും ട്രെൻഡായി തുടരുന്നത്“– ജയരാജ് പറഞ്ഞു.
