ഈ വർഷം തുടക്കം മുതൽ വാട്‌സ്ആപ്പിൽ നിരവധി ഫീച്ചറുകളാണ് മെറ്റ അവതരിപ്പിച്ചിരിക്കുന്നത്. വർഷാവസാനത്തിന് ഇനി ദിവസങ്ങൾ മാത്രം ബാക്കി നിൽക്കെ പുതിയ ഫീച്ചറുകളുടെ നിര തന്നെയാണ് വാട്‌സ്ആപ്പിലേക്കെത്തുന്നത്. ഉപയോക്താക്കൾക്കിടയിൽ വാട്‌സ്ആപ്പ് കൂടുതൽ ജനപ്രിയമാക്കുന്നതിനായി അടുത്തിടെ നിരവധി അപ്‌ഡേറ്റുകൾ കമ്പനി അവതരിപ്പിച്ചിരുന്നു. ഇതിനൊപ്പം മറ്റൊരു ഫീച്ചർ കൂടി വാട്‌സ്ആപ്പ് അവതരിപ്പിച്ചിരിക്കുന്നുവെന്ന റിപ്പോർട്ടാണ് പുറത്തു വന്നിരിക്കുന്നത്.
വീഡിയോ കോളിനിടെ സുഹൃത്തുക്കളും ഒന്നിച്ച് സംഗീതം ആസ്വദിക്കുന്നതിനും പങ്കിടുന്നതിനും സാധിക്കുന്ന ഫീച്ചറാണ് വാട്‌സ്ആപ്പിലേക്കെത്തുന്നത്. അടുത്തിടെ പുറത്തിറങ്ങിയ സ്‌ക്രീൻ ഷെയറിംഗ് ഫീച്ചറിന്റെ തുടർച്ചയായാണ് മ്യൂസിക് ഷെയറിംഗ് ഫീച്ചർ വാട്‌സ്ആപ്പിൽ എത്തുന്നതെന്നാണ് വിവരം. എന്നാൽ വീഡിയോ കോളിനിടയിൽ മാത്രമാകും ഇത്തരത്തിൽ മ്യൂസിക് പങ്കുവയ്‌ക്കാനും ആസ്വദിക്കാനും സാധിക്കുക. എന്നാൽ ഓഡിയോ കോളുകളിൽ ഈ സേവനം ആസ്വദിക്കാനാകില്ല.
നിലവിൽ ഫീച്ചറുകൾ ഫോണുകളിലെത്താൻ തുടങ്ങിയിട്ടില്ല. പ്രാഥമിക ഘട്ടത്തിൽ ഐഒഎസ് ആപ്പുകൾക്കായുള്ള ഫീച്ചറാണ് വികസിപ്പിച്ചുകൊണ്ടിരിക്കുന്നത്. ബീറ്റാ പതിപ്പിനെ കുറിച്ചോ ആൻഡ്രോയിഡ് ഉപയോക്താക്കളിൽ ഫീച്ചർ എപ്പോഴെത്തുമെന്നോ സംബന്ധിച്ച് കമ്പനി ഔദ്യോഗിക സ്ഥിരീകരണം നടത്തിയിട്ടില്ല. പുതിയ ഫീച്ചറെത്തുന്നതോടെ വാട്‌സ്ആപ്പ് കൂടുതൽ ഇന്ററാക്ടീവ് ആകുമെന്നാണ് പ്രതീക്ഷ.
