ന്യൂഡൽഹി: സമ്മർദ്ദത്തെ അകറ്റി, പരീക്ഷകളെ സമാധാനത്തോടെ നേരിടാൻ വിദ്യാർത്ഥികളെ പ്രാപ്തരാക്കുക എന്നതാണ് ‘പരീക്ഷ പേ ചർച്ച’യിലൂടെ താൻ ലക്ഷ്യമിടുന്നതെന്ന് പ്രധാനമന്ത്രി നരേന്ദ്രമോദി. ഇത്തവണത്തെ പരീക്ഷ പേ ചർച്ചയെ കുറിച്ച് വിദ്യാർത്ഥികളേയും അദ്ധ്യാപകരേയും രക്ഷിതാക്കളേയും അറിയിച്ചുകൊണ്ടുള്ള കേന്ദ്ര വിദ്യാഭ്യാസ മന്ത്രാലയത്തിന്റെ പോസ്റ്റിലാണ് പ്രധാനമന്ത്രിയുടെ പരാമർശം.
പരീക്ഷാ പേ ചർച്ച തിരിച്ചെത്തിയിരിക്കുകയാണ്. വിദ്യാർത്ഥികളും രക്ഷിതാക്കളും അദ്ധ്യാപകരും പരീക്ഷാ പേ ചർച്ചയിൽ പങ്കാളികളാണമെന്നും പ്രധാനമന്ത്രിയുമായി സംവദിക്കാനുള്ള അവസരം വിനിയോഗിക്കണമെന്നും വിദ്യാഭ്യാസ മന്ത്രാലയത്തിന്റെ കുറിപ്പിൽ പറയുന്നു. അവസാന വർഷ പരീക്ഷകൾക്ക് മുന്നോടിയായാണ് എല്ലാ വർഷവും പരീക്ഷാ പേ ചർച്ച സംഘടിപ്പിക്കുന്നത്. പരീക്ഷയെ നേരിടുന്നതുമായി ബന്ധപ്പെട്ട് വിദ്യാർത്ഥികൾക്കുണ്ടാകുന്ന സംശയങ്ങൾക്കും അദ്ദേഹം ഇതിൽ മറുപടി നൽകാറുണ്ട്.
” സമ്മർദ്ദങ്ങളെ അകറ്റി അതിനെ വിജയമാക്കി മാറ്റുക എന്നതാണ് പരീക്ഷാ പേ ചർച്ചയിലൂടെ ലക്ഷ്യമാക്കുന്നത്. പരീക്ഷ എഴുതുന്ന ഓരോരുത്തരേയും പുഞ്ചിരിയോടെ നേരിടാൻ ഇത് പ്രാപ്തരാക്കുന്നു. നിങ്ങൾക്ക് പരീക്ഷകളെ എളുപ്പമാക്കാൻ സഹായിക്കുന്ന ഒരു ഉപായവും ഇതിൽ പങ്കെടുക്കുന്ന മറ്റൊരാളിൽ നിന്ന് ലഭിച്ചേക്കാമെന്നും” പ്രധാനമന്ത്രി പറഞ്ഞു.