ന്യൂഡൽഹി:ജയിലിൽ കിടന്ന് അരവിന്ദ് കെജ്രിവാളിന്റെ ഭാരം കുറഞ്ഞുവെന്ന ആരോപണവുമായി ആം ആദ്മി. മാർച്ച് 21ന് ഡൽഹി മദ്യനയക്കേസിൽ അറസ്റ്റിലായതിന് പിന്നാലെ കെജ്രിവാളിന്റെ തൂക്കം 4.5 കിലോ കുറഞ്ഞുവെന്നാണ് ഡൽഹി മന്ത്രിസഭാംഗവും ആം ആദ്മി നേതാവുമായ അതിഷി ആരോപിച്ചത്. ഇത്തരത്തിൽ വളരെ പെട്ടന്ന് ഭാരം കുറയുന്നത് കെജ്രിവാളിന്റെ ആരോഗ്യസ്ഥിതി അപകടത്തിലാക്കുമെന്നും, ഡോക്ടർമാർ ആശങ്ക അറിയിച്ചു എന്നും അതിഷി പറയുന്നു.
”ബിജെപിയാണ് കെജ്രിവാളിന്റെ ആരോഗ്യം അപകടത്തിലാക്കുന്നത്. അരവിന്ദ് കെജ്രിവാൾ കടുത്ത പ്രമേഹരോഗം ഉള്ളയാളാണ്. എന്നാൽ ആരോഗ്യപ്രശ്നങ്ങൾക്കിടയിലും 24 മണിക്കൂറും രാജ്യത്തിന് വേണ്ടി സേവനം ചെയ്തിരുന്ന വ്യക്തിയാണ് അദ്ദേഹം. അറസ്റ്റ് ഉണ്ടായതിന് ശേഷം കെജ്രിവാളിന്റെ ശരീരഭാരം 4.5 കിലോയാണ് കുറഞ്ഞത്. അദ്ദേഹത്തിന് എന്തെങ്കിലും സംഭവിച്ചാൽ ഈ രാജ്യം മാത്രമല്ല, ദൈവം പോലും നിങ്ങളോട് പൊറുക്കില്ലെന്നും” അതിഷി സമൂഹമാദ്ധ്യമത്തിൽ കുറിച്ചു.
എന്നാൽ അതിഷിയുടെ വാദങ്ങൾ തിഹാർ ജയിൽ അധികൃതർ നിഷേധിച്ചു. ജയിലിൽ എത്തുമ്പോൾ 55 കിലോ ആയിരുന്നു കെജ്രിവാളിന്റെ ശരീരഭാരം. അത് ഇപ്പോഴും അങ്ങനെ തന്നെയാണ്. അദ്ദേഹത്തിന്റെ ആരോഗ്യനിലയിലും യാതൊരുവിധ പ്രശ്നങ്ങളുമില്ല. ഷുഗർ ലെവൽ നിലവിൽ സാധാരണ നിലയിലാണെന്നും അധികൃതർ അറിയിച്ചു. കഴിഞ്ഞ ചൊവ്വാഴ്ച ഷുഗർ ലെവലിൽ വ്യതിയാനം വന്നതോടെ ജയിലിൽ ഡോക്ടർമാരുടെ നിരീക്ഷണത്തിലായിരുന്നു കെജ്രിവാൾ.
24 മണിക്കൂറും സെല്ലിൽ ഘടിപ്പിച്ച സിസിടിവി ക്യാമറ വഴി കെജ്രിവാളിനെ നിരീക്ഷിക്കുന്നുണ്ട്. ഏപ്രിൽ 15 വരെ ജുഡീഷ്യൽ കസ്റ്റഡിയിൽ റിമാൻഡിലാണ് കെജ്രിവാൾ. കഴിഞ്ഞ ദിവസം ഭാര്യ സുനിതയുമായി വീഡിയോ കോൺഫറൻസിലൂടെ സംസാരിക്കാനുള്ള സൗകര്യം ജയിൽ അധികൃതർ ഒരുക്കി നൽകിയിരുന്നു. ഉച്ചയ്ക്ക് ശേഷം വീട്ടിൽ നിന്നുള്ള ഭക്ഷണം കഴിക്കാൻ കെജ്രിവാളിന് അനുമതി നൽകിയതായും ജയിൽ അധികൃതർ പറയുന്നു. ജയിലിൽ കാണാൻ ആഗ്രഹിക്കുന്ന ആറ് പേരുടെ പട്ടിക കെജ്രിവാൾ കഴിഞ്ഞ ദിവസം ജയിൽ മേധാവിമാർക്ക് കൈമാറിയിരുന്നു. ഭാര്യ, മകൻ, മകൾ, കെജ്രിവാളിന്റെ പ്രൈവറ്റ് സെക്രട്ടറി ബിഭവ് കുമാർ, ആംആദ്മി ജനറൽ സെക്രട്ടറി സന്ദീപ് പഥക് എന്നിവരുടെ പേരാണ് പട്ടികയിലുള്ളത്.
