തെരഞ്ഞെടുപ്പ് സമയത്ത് സുരേഷ് ഗോപിക്കെതിരെ നടന്ന പ്രചാരണങ്ങൾ തന്റെ മനസ്സിനെ വല്ലാതെ ബാധിച്ചുവെന്ന് മകൻ ഗോകുൽ സുരേഷ്. വനിതാ മാധ്യമപ്രവർത്തകയുടെ അടക്കമുള്ള വിഷയങ്ങൾ ചൂണ്ടിക്കാട്ടിയാണ് താരത്തിന്റെ പ്രതികരണം. അച്ഛനെ ഒരു മോശക്കാരനാക്കാൻ എങ്ങനെയൊക്കെ ശ്രമിക്കാവോ, അങ്ങനെയെല്ലാം ചിലർ ശ്രമിച്ചുവെന്നും ഒരു ഓൺലൈൻ മാധ്യമത്തിന് നൽകിയ അഭിമുഖത്തിൽ ഗോകുൽ സുരേഷ് പറഞ്ഞു.
“എന്നെ മാനസികമായി വേദനിപ്പിച്ച ഒരുപാട് പ്രശ്നങ്ങൾ അടുത്തിടെ ഉണ്ടായിട്ടുണ്ട്. ഈ തെരഞ്ഞെടുപ്പ് സമയത്തും അതിന് മുൻപും അച്ഛനെ എങ്ങനെയൊക്കെ ചിത്രീകരിക്കാൻ ശ്രമിച്ചുവോ അതെല്ലാം എന്നെ ഒരുപാട് വേദനിപ്പിച്ചു. വനിതാ മാധ്യമപ്രവർത്തകയുടെ വിഷയം, മാതാവിന്റെ വിഷയം, ഞങ്ങളുടെ വണ്ടിയുടെ രജിസ്ട്രേഷൻ, അച്ഛന്റെ സഹോദരന്റെ പ്രശ്നം ഇങ്ങനെ നീളുന്നു. എങ്ങനെയൊക്കെ അച്ഛനെ വലിയ തീവ്രവാദി ആക്കാൻ ശ്രമിക്കാവോ അങ്ങനെയല്ലാം പണിയാൻ ശ്രമിച്ചിട്ടുണ്ട്. എന്നാൽ നേരും നന്മയും നിലനിൽക്കുന്ന കൊണ്ട് അച്ഛനെ അതൊന്നും ബാധിച്ചിട്ടില്ല. പക്ഷേ, എന്നെ അത് ബാധിച്ചിട്ടുണ്ട്”.
“അച്ഛനെതിരെ നടന്നതെല്ലാം മനസ്സിൽ ഇങ്ങനെ കിടക്കുകയാണ്. ഞാൻ കുറച്ചു കൂടെ പക്വത ആകുമ്പോൾ അതിനനുസരിച്ച് മാറിയേക്കും. അച്ഛനെപ്പോലെ മാറിയാൽ ഇപ്പോൾ നടക്കുന്ന അക്രമങ്ങൾ എല്ലാം കണ്ടില്ല എന്ന് വെച്ച് എനിക്ക് പോകാൻ പറ്റിയേക്കും”-ഗോകുൽ സുരേഷ് പറഞ്ഞു.
