നടി രാകുൽ പ്രീത് സിംഗിന്റെ സഹോദരൻ അമൻ പ്രീത് സിംഗ് ലഹരി കേസിൽ അറസ്റ്റിലായി. ഇയാളടക്കം 5 പേരെയാണ് ഹൈദരാബാദ് പാെലീസ് പിടികൂടിയത്. ഇവരുടെ സംഘത്തിന്റെ കൈയിൽ നിന്ന് വില്പനയ്‌ക്കെത്തിച്ച 2.6 കിലോ കൊക്കെയ്നും ലഹരിവിരുദ്ധ സ്ക്വാഡ് കണ്ടെടുത്തിട്ടുണ്ട്. മയക്കുമരുന്ന് റാക്കറ്റിനെ പിടികൂടിയ പൊലീസ് സംഘം അമൻ അടങ്ങുന്ന 30 ഇടപാടുകാരെയും തിരിച്ചറിഞ്ഞിട്ടുണ്ട്.
അമൻ പ്രീത് സിംഗ്, അനികേത് റെഡ്ഡി, പ്രസാദ്, മധുസൂദനൻ, നിഖിൽ ധാമൻ എന്നിവരാണ് ഇപ്പോൾ പൊലീസ് കസ്റ്റഡിയിലുള്ളത്. വൈദ്യ പരിശോധനയ്‌ക്ക് ശേഷം ഇവരെ കോടതിയിൽ ഹാജരാക്കും. പിടികൂടിയവരെല്ലാവരും ലഹരി ഉപയോഗിച്ചിട്ടുണ്ടെന്ന കാര്യം തിരിച്ചറിഞ്ഞിട്ടുണ്ട്. മൂത്ര സാമ്പിളുകൾ പരിശോധിച്ചതിന് ശേഷമാണ് സ്ഥിരീകരിച്ചതെന്ന് രാജേന്ദ്ര നഗറിലെ സൈബർ പൊലീസ് ഡിസിപി പറഞ്ഞു.
നടി രാകുൽ പ്രീത് സിംഗിനെ ലഹരികടത്ത് കേസിൽ 2022 ൽ ഇഡി ചോദ്യം ചെയ്തിരുന്നു. കഴിഞ്ഞ വർഷവും ഇവരിൽ നിന്ന് മൊഴി എടുത്തിരുന്നു. ഇവർക്കാെപ്പം നടി ചാർമി കൗർ,നവദീപ്, രവി തേജ,പുരി ജഗനാഥ്, റാണ ദാഗ്ഗുബട്ടി എന്നിവരുടെ മൊഴിയും ശേഖരിച്ചിരുന്നു.
