സിംഗപ്പൂരിലെ സ്വീകരണ ചടങ്ങിൽ നാസിക് ഡോൽ കൊട്ടി പ്രധാനമന്ത്രി; താളം ഏറ്റെടുത്ത് കാണികൾ; വീഡിയോ വൈറൽ

ന്യൂഡൽഹി: ബ്രൂണെ സന്ദർശനം പൂർത്തിയാക്കിയ ശേഷം സിംഗപ്പൂരിലെത്തിയ പ്രധാനമന്ത്രി നരേന്ദ്രമോദിയെ വരവേറ്റ് ഇന്ത്യൻ സമൂഹം. നിരവധി പേരാണ് പ്രധാനമന്ത്രിയെ കാണാനായി സിംഗപ്പൂരിൽ തടിച്ചുകൂടിയത്. പ്രത്യേക വേഷവിധാനങ്ങളോടെ ഇന്ത്യയുടെ തനത് നൃത്തച്ചുവടുകളുമായിട്ടാണ് പ്രവാസി ഭാരതീയർ പ്രധാനമന്ത്രിയെ സ്വീകരിച്ചത്.

മഹാരാഷ്‌ട്രയിലെ തനത് കലാരൂപമായ ‘ലാവനി’ നൃത്തം ഉൾപ്പെടെയാണ് ഒരുക്കിയത്. നൃത്തസംഘത്തിനൊപ്പം ഉണ്ടായിരുന്ന ഡോൽ കലാകാരൻമാർക്ക് ഒപ്പമാണ് പ്രധാനമന്ത്രിയും ഡോലിൽ താളമിട്ടത്. പ്രധാനമന്ത്രി കൂടി ചേർന്നതോടെ സംഘത്തിന്റെ ആവേശം ഇരട്ടിയായി. ഒരു മിനിറ്റോളം അദ്ദേഹം ഡോലിൽ താളം മുഴക്കി. കലാകാരൻമാരെ അഭിനന്ദിച്ച ശേഷമാണ് മുന്നോട്ടു നീങ്ങിയത്.

പ്രധാനമന്ത്രി ഡോൽ കൊട്ടുന്ന വീഡിയോ ഇന്റർനെറ്റിലും തരംഗമായി. വാദ്യോപകരണങ്ങളോടുളള പ്രധാനമന്ത്രിയുടെ കമ്പം നേരത്തെ പല ഘട്ടങ്ങളിലും ചടങ്ങുകളിലും അദ്ദേഹം പ്രകടിപ്പിച്ചിട്ടുണ്ട്.

VIDEO | PM Modi (@narendramodi) tried his hands at ‘dhol’ as he received a warm welcome upon arrival at Marina Bay, #Singapore.

(Source: Third Party) pic.twitter.com/hY4WAyELFy

— Press Trust of India (@PTI_News) September 4, 2024

ഇന്ത്യ- സിംഗപ്പൂർ നയതന്ത്രബന്ധം ഊഷ്മളമാക്കാൻ രണ്ട് ദിവസത്തെ സന്ദർശനത്തിനായാണ് പ്രധാനമന്ത്രി സിംഗപ്പൂരിലെത്തിയത്. ചാംഗി വിമാനത്താവളത്തിലെത്തിയ അദ്ദേഹത്തെ സിംഗപ്പൂർ പ്രധാനമന്ത്രി ലോറൻസ് വോങ് സ്വീകരിച്ചു. ഇരു രാജ്യങ്ങളുടെയും സൗഹൃദം വർദ്ധിപ്പിക്കുന്നതിനായി വിവിധ നേതാക്കളുമായും ബിസിനസ് പ്രമുഖരുമായും അദ്ദേഹം ചർച്ചകൾ സംഘടിപ്പിക്കും.