സിംഗപ്പൂർ: പ്രധാനമന്ത്രി നരേന്ദ്രമോദിയെ നേരിൽ കണ്ടതിന്റെ സന്തോഷം പങ്കുവച്ച് സിംഗപ്പൂർ പ്രധാനമന്ത്രി ലോറൻസ് വോങ്. ഇസ്താനയിൽ ഒരുക്കിയ വിരുന്ന് സത്ക്കാരത്തിൽ നരേന്ദ്രമോദി അതിഥിയാകുന്നതിൽ അതിയായ സന്തോഷമുണ്ടെന്നും ലോറൻസ് വോങ് എക്‌സിൽ കുറിച്ചു.
” ഇന്ത്യൻ പ്രധാനമന്ത്രി നരേന്ദ്രമോദിക്ക് സിംഗപ്പൂരിലേക്ക് സ്വാഗതം. ഔദ്യോഗിക ചർച്ചകൾക്ക് മുന്നോടിയായി ഇസ്താനയിൽ ഒരുക്കിയ വിരുന്നിലേക്ക് പ്രധാനമന്ത്രി നരേന്ദ്രമോദിയെ സ്വീകരിക്കുന്നതിൽ അതിയായ സന്തോഷമുണ്ട്.”- ലോറൻസ് വോങ്ങ് കുറിച്ചു. പ്രധാനമന്ത്രിയെ ആലിംഗനം ചെയ്ത് നിൽക്കുന്ന ചിത്രവും സിംഗപ്പൂർ പ്രധാനമന്ത്രി എക്‌സിൽ പങ്കുവച്ചിരുന്നു.
Welcome PM @narendramodi to Singapore! Delighted to have the chance to catch up over a meal at the Istana, before the official meetings tomorrow. pic.twitter.com/6ceCrKwbAF
— Lawrence Wong (@LawrenceWongST) September 4, 2024
ഇന്ത്യ- സിംഗപ്പൂർ നയതന്ത്രബന്ധം ശക്തിപ്പെടുത്തുകയെന്ന ലക്ഷ്യത്തോടെയാണ് ബ്രൂണെ സന്ദർശത്തിന് ശേഷം പ്രധാനമന്ത്രി സിംഗപ്പൂരിലെത്തിയത്. സിംഗപ്പൂരും ഇന്ത്യയുമായുള്ള സാമ്പത്തിക സഹകരണം, വ്യാപാരം, സാംസ്‌കാരികം തുടങ്ങിയ മേഖലകളിലെ ബന്ധം ഊഷ്‌ളമാക്കുന്നതിൽ ഇരുനേതാക്കളും ചർച്ച നടത്തും. ദ്വിദിന സന്ദർശനത്തിനായാണ് പ്രധാനമന്ത്രി സിംഗപ്പൂരിലെത്തിയത്.
ലോറൻസ് വോങുമായുള്ള കൂടിക്കാഴ്ചയ്‌ക്ക് ശേഷം പ്രധാനമന്ത്രി സിംഗപ്പൂർ പ്രസിഡന്റുമായും മുതിർന്ന മന്ത്രിമാരുമായും കൂടിക്കാഴ്ച നടത്തും. സിംഗപ്പൂരിലെ ഇന്ത്യൻ സമൂഹവുമായും അദ്ദേഹം സംവദിക്കും. ഇരുരാജ്യങ്ങൾ തമ്മിലുള്ള സാമ്പത്തിക സഹകരണം വർദ്ധിപ്പിക്കുന്നതിനും നിക്ഷേപങ്ങൾ വർദ്ധിപ്പിക്കുന്നതിനും പ്രധാനമന്ത്രിയുടെ സിംഗപ്പൂർ സന്ദർശനം സഹായകരമാകുമെന്നാണ് വിലയിരുത്തൽ. 2018ന് ശേഷം ആദ്യമായാണ് പ്രധാനമന്ത്രി സിംഗപ്പൂരിലെത്തുന്നത്.
