തിരുവനന്തപുരം: കേരളത്തില് കോണ്ഗ്രസ് മുന്നോട്ടുവെക്കുന്നത് വികസനമല്ല, മറിച്ച് പച്ചക്കള്ളങ്ങളാണെന്ന് നേമത്തെ എന്ഡിഎ സ്ഥാനാര്ത്ഥിയും ബിജെപി സംസ്ഥാന അധ്യക്ഷനുമായ രാജീവ് ചന്ദ്രശേഖര്. ഇന്ദിരാ ഗാരന്റി എന്നത് വെറും വ്യാജ വാഗ്ദാനം മാത്രമാണെന്നും അദ്ദേഹം പരിഹസിച്ചു. തിരഞ്ഞെടുപ്പ് പ്രചാരണത്തിന്റെ ഭാഗമായി മാധ്യമങ്ങളോട് സംസാരിക്കുകയായിരുന്നു അദ്ദേഹം.
കോണ്ഗ്രസിന്റെ മുതിര്ന്ന നേതാക്കളായ മല്ലികാര്ജുന് ഖര്ഗെയും ഡി കെ ശിവകുമാറും ബിജെപിക്കെതിരെ ഉന്നയിക്കുന്ന ആരോപണങ്ങള് ചിരിക്കാന് വകനല്കുന്നതാണെന്ന് രാജീവ് ചന്ദ്രശേഖര് പറഞ്ഞു. അഴിമതി ആരോപണങ്ങളില് മുങ്ങിനില്ക്കുന്ന ഇവരുടെ പശ്ചാത്തലം ജനങ്ങള്ക്കറിയാം. സ്വന്തം വീഴ്ചകള് മറയ്ക്കാനാണ് ഇവര് മറ്റുള്ളവര്ക്കെതിരെ ‘ഡീല്’ ആരോപണങ്ങള് ഉന്നയിക്കുന്നതെന്നും അദ്ദേഹം കൂട്ടിച്ചേര്ത്തു.
സംസ്ഥാനത്ത് ഇടതും വലതും തമ്മില് രഹസ്യ ധാരണയുണ്ടെന്നതിന് നിരവധി തെളിവുകളുണ്ടെന്ന് അദ്ദേഹം ചൂണ്ടിക്കാട്ടി. ശബരിമലയിലെ സ്വര്ണ്ണക്കൊള്ള, ആരോഗ്യ-വിദ്യാഭ്യാസ മേഖലകളിലെ സര്ക്കാരിന്റെ പരാജയങ്ങള് എന്നിവയില് കഴിഞ്ഞ 10 വര്ഷമായി കോണ്ഗ്രസ് മൗനം പാലിക്കുകയാണ്. സിപിഐഎമ്മും കോണ്ഗ്രസും തമ്മിലുള്ള പരസ്യമായ ഡീലിന്റെ പേരാണ് ‘ഇന്ത്യന് സഖ്യം’. ഡീല് ഉണ്ടെന്ന് എല്ലാവര്ക്കും അറിയാം, അത് എന്താണെന്ന് വ്യക്തമാക്കേണ്ടത് കോണ്ഗ്രസാണെന്നും അദ്ദേഹം പറഞ്ഞു.
യുഡിഎഫ് അധികാരത്തില് വന്നാല് മുസ്ലിം ലീഗിന് ഉപമുഖ്യമന്ത്രി പദം നല്കാനാണ് നീക്കമെന്ന് രാജീവ് ചന്ദ്രശേഖര് വെളിപ്പെടുത്തി. ആറ് മന്ത്രിസ്ഥാനങ്ങളാണ് ലീഗിനായി മാറ്റിവെച്ചിരിക്കുന്നത്. ഇത് വര്ഗീയ പ്രീണന രാഷ്ട്രീയത്തിന്റെ ഭാഗമാണെന്നും അദ്ദേഹം ആരോപിച്ചു. സിപിഐഎമ്മുമായി ബിജെപിക്ക് ഏതെങ്കിലും തരത്തിലുള്ള ധാരണയുണ്ടാകാനുള്ള സാധ്യത വട്ടപൂജ്യമാണ്. സിപിഐഎമ്മിന്റെ അഴിമതികളെയും ജനവിരുദ്ധ നയങ്ങളെയും തെരുവിലും കോടതിയിലും ശക്തമായി നേരിടുന്ന ഏക പാര്ട്ടി ബിജെപിയാണ്.
അഴിമതിക്കാരുമായി സന്ധി ചെയ്യേണ്ട സാഹചര്യം ബിജെപിക്കില്ലെന്നും രാജീവ് ചന്ദ്രശേഖര് വ്യക്തമാക്കി. നരേന്ദ്ര മോദി സര്ക്കാരിന്റെ വികസന നേട്ടങ്ങള് ഉയര്ത്തിക്കാട്ടി എന്ഡിഎ കേരളത്തില് വലിയ മുന്നേറ്റം നടത്തുമെന്നും അദ്ദേഹം പ്രത്യാശ പ്രകടിപ്പിച്ചു.
