കാസറഗോഡ്: നിയമസഭാ തിരഞ്ഞെടുപ്പിന്റെ വോട്ടെടുപ്പിന് മണിക്കൂറുകള് മാത്രം ബാക്കിനില്ക്കെ, മഞ്ചേശ്വരം മണ്ഡലത്തില് യുഡിഎഫ് വ്യാപകമായി കള്ളവോട്ടിന് ആസൂത്രണം ചെയ്യുന്നതായി ബിജെപി. വിദേശത്തുള്ള പ്രവാസികളുടെയും മണ്ഡലത്തിന് പുറത്തുള്ളവരുടെയും വോട്ടുകള് നിയമവിരുദ്ധമായി വിനിയോഗിക്കാന് നീക്കം നടക്കുന്നുണ്ടെന്ന് കാണിച്ച് ബിജെപി ജില്ലാ നേതൃത്വം തിരഞ്ഞെടുപ്പ് കമ്മീഷനെ സമീപിച്ചു.
മുസ്ലീം ലീഗിന് വ്യക്തമായ മേല്ക്കോയ്മയുള്ള 33 ബൂത്തുകള് കേന്ദ്രീകരിച്ചാണ് ക്രമക്കേടുകള്ക്ക് പദ്ധതിയിട്ടിരിക്കുന്നതെന്ന് ബിജെപി ആരോപിക്കുന്നു. വിദേശത്തുള്ള പ്രവാസികളുടെയും മരിച്ചുപോയവരുടെയും വോട്ടര് സ്ലിപ്പുകള് യുഡിഎഫ് പ്രവര്ത്തകര് വീടുകളില് നിന്ന് മുന്കൂട്ടി ശേഖരിച്ചതായി പരാതിയില് പറയുന്നു. ചില പോളിംഗ് ഉദ്യോഗസ്ഥരുടെ മൗനാനുവാദത്തോടെ പ്രവാസികളുടെ പേരില് മറ്റൊരാളെക്കൊണ്ട് വോട്ട് ചെയ്യിക്കാനാണ് ശ്രമം.
കള്ളവോട്ട് സാധ്യതയുള്ള പ്രത്യേക ബൂത്തുകളുടെ പട്ടികയും ബിജെപി കമ്മീഷന് കൈമാറിയിട്ടുണ്ട്. ബിജെപിയുടെ പരാതി ഗൗരവമായി പരിഗണിച്ച തിരഞ്ഞെടുപ്പ് കമ്മീഷന് മഞ്ചേശ്വരത്ത് കടുത്ത നിരീക്ഷണത്തിന് ഉത്തരവിട്ടു. സംശയമുള്ള എല്ലാ ബൂത്തുകളിലും വോട്ടെടുപ്പ് നടപടികള് തത്സമയം നിരീക്ഷിക്കാന് വെബ്കാസ്റ്റിംഗ് സംവിധാനം ഏര്പ്പെടുത്തും. വിദേശത്തുള്ളവരുടെ പ്രത്യേക പട്ടിക ബിജെപി ബൂത്ത് ഏജന്റുമാര്ക്ക് കൈമാറി. ഈ പട്ടികയിലുള്ള ആരെങ്കിലും വോട്ട് ചെയ്യാന് എത്തിയാല് കര്ശനമായ രേഖാപരിശോധനയ്ക്ക് വിധേയമാക്കും.
വോട്ടര് സ്ലിപ്പിന് പുറമെ കേന്ദ്ര കമ്മീഷന് അംഗീകരിച്ച മറ്റ് ഔദ്യോഗിക തിരിച്ചറിയല് രേഖകള് ഉണ്ടെങ്കില് മാത്രമേ വോട്ട് ചെയ്യാന് അനുവദിക്കൂ എന്ന് ഉദ്യോഗസ്ഥര്ക്ക് നിര്ദ്ദേശം നല്കി. മഞ്ചേശ്വരത്തെ മുന്കാല തിരഞ്ഞെടുപ്പ് ചരിത്രം കണക്കിലെടുത്ത് പ്രശ്നബാധിത ബൂത്തുകളില് കേന്ദ്ര സേനയെ വിന്യസിക്കാനും കമ്മീഷന് ആലോചിക്കുന്നുണ്ട്. കള്ളവോട്ട് തടയാന് ബൂത്ത് തലത്തില് ശക്തമായ പ്രതിരോധം തീര്ക്കുമെന്ന് ബിജെപി നേതൃത്വവും വ്യക്തമാക്കി. വോട്ടെടുപ്പ് സുതാര്യമാക്കാന് എല്ലാ നടപടികളും സ്വീകരിച്ചതായി ജില്ലാ കളക്ടര് അറിയിച്ചു.
