കൊച്ചി: ഏറെ കോളിളക്കം സൃഷ്ടിച്ച ശബരിമല സ്വര്ണ്ണക്കവര്ച്ചാ കേസിന്റെ അന്വേഷണത്തില് പുതിയ നീക്കങ്ങളുമായി എന്ഫോഴ്സ്മെന്റ് ഡയറക്ടറേറ്റ്. നിലവിലെ അന്വേഷണ ഉദ്യോഗസ്ഥനായ അസിസ്റ്റന്റ് ഡയറക്ടര് ആശു ഗോയലിന് പകരം ധര്മ്മേന്ദ്ര ചൗഹാന് കേസിന്റെ ചുമതലയേല്ക്കും. ഇഡി കൊച്ചി സോണലിലെ ഉദ്യോഗസ്ഥരുടെ സ്വാഭാവിക സ്ഥലംമാറ്റത്തിന്റെ ഭാഗമായാണ് ഈ മാറ്റമെങ്കിലും, പുതിയ നേതൃത്വം വരുന്നതോടെ അന്വേഷണം കൂടുതല് വേഗത്തിലാകുമെന്നാണ് സൂചന. ധര്മ്മേന്ദ്ര ചൗഹാന് കൊച്ചിയില് ചുമതലയേല്ക്കുമ്പോള്, ആശു ഗോയലിനെ ചെന്നൈ സബ് സോണല് ഓഫീസിലേക്കാണ് മാറ്റിയിരിക്കുന്നത്.
കൊച്ചി സോണല് മേധാവി അഡീഷണല് ഡയറക്ടര് രാകേഷ് കുമാര് സുമനെ ലഖ്നൗവിലേക്ക് മാറ്റി. ചെന്നൈ സോണല് മേധാവിയായിരുന്നു അര്പ്പിത് എ. ആനന്ദിനാണ് കൊച്ചി സോണലിന്റെ അധിക ചുമതല. കരുവന്നൂര് കേസ് അന്വേഷിച്ചിരുന്ന നിര്മ്മല് കുമാര് മോക്ഷ, പാതിവില തട്ടിപ്പ് കേസ് ഉദ്യോഗസ്ഥന് ശ്രീനിവാസ റാവു എന്നിവര്ക്കും സ്ഥലംമാറ്റമുണ്ട്. കേസിലെ മുഖ്യപ്രതിയായ ഉണ്ണികൃഷ്ണന് പോറ്റിയെ ചോദ്യം ചെയ്യാനുള്ള നീക്കത്തിലാണ് ഇഡി. ഇതിനോടകം തന്നെ കണ്ഠരര് രാജീവര്, എന്. വാസു, ജയറാം, മുരാരി ബാബു എന്നിവരെ ഇഡി ചോദ്യം ചെയ്തിരുന്നു. ഉണ്ണികൃഷ്ണന് പോറ്റിയില് നിന്ന് ശേഖരിക്കുന്ന പുതിയ വിവരങ്ങളുടെയും തെളിവുകളുടെയും അടിസ്ഥാനത്തില്, മുന്പ് ചോദ്യം ചെയ്തവരെ വീണ്ടും വിളിപ്പിക്കാന് സാധ്യതയുണ്ട്. ആവശ്യമെങ്കില് ഇവരെ ഒരുമിച്ചിരുത്തി ചോദ്യം ചെയ്യാനും അന്വേഷണ സംഘം ആലോചിക്കുന്നു.
ലോക്കല് പോലീസിന്റെ അന്വേഷണ പരിമിതികള് മറികടന്ന്, സാമ്പത്തിക ഇടപാടുകളിലെ കൃത്യമായ തെളിവുകള് ശേഖരിച്ച് എത്രയും വേഗം കുറ്റപത്രം സമര്പ്പിക്കാനാണ് ഇഡി ലക്ഷ്യമിടുന്നത്. അടുത്ത ആഴ്ച തന്നെ പുതിയ ഉദ്യോഗസ്ഥര് ചുമതലയേല്ക്കുന്നതോടെ കേസ് നടപടികള് കൂടുതല് കടുപ്പിക്കാനാണ് അധികൃതരുടെ തീരുമാനം.
