തൃശൂർ: വടക്കഞ്ചേരി–മണ്ണുത്തി ദേശീയപാതയിലെ നീലിപാറയിൽ ഓട് കയറ്റിവന്ന പിക്കപ്പ് വാൻ ഇടിച്ച് രണ്ട് സ്കൂൾ വിദ്യാർഥിനികൾക്ക് പരിക്കേറ്റു. പന്തലപാടം മേരി മാതാ സ്കൂളിലെ പ്ലസ് വൺ വിദ്യാർഥിനികളായ നന്ദന (15), ശ്രേയ (16) എന്നിവർക്കാണ് പരിക്കേറ്റത്.
ഇന്ന് വൈകിട്ട് നാലരയോടെയായിരുന്നു അപകടം. ദേശീയപാതയുടെ അരികിലൂടെ തൊട്ടടുത്ത വാണിയമ്പാറ ബസ് സ്റ്റോപ്പിലേക്ക് നടന്നുപോകുന്നതിനിടെയാണ് പിക്കപ്പ് വാൻ ഇരുവരെയും ഇടിച്ചത്. അപകടത്തിൽ നന്ദനയുടെ തലയ്‌ക്ക് പരിക്കേറ്റിട്ടുണ്ട്. ഇരുവരെയും ഇരട്ടക്കുളം സ്വകാര്യ ആശുപത്രിയിൽ പ്രവേശിപ്പിച്ച് ചികിത്സ നൽകുകയാണ്. നന്ദനയ്‌ക്ക് സ്കാനിങ് ഉൾപ്പെടെയുള്ള പരിശോധനകൾ നടത്തിവരികയാണ്.
അപകടത്തിന് പിന്നാലെ പിക്കപ്പ് വാൻ നിയന്ത്രണംവിട്ട് റോഡിന് കുറുകെ മറിഞ്ഞു. വാഹനത്തിലുണ്ടായിരുന്ന ഓടുകൾ റോഡിലാകെ ചിതറിക്കിടന്നതോടെ ദേശീയപാതയിൽ തൃശൂരിൽ നിന്ന് പാലക്കാട്ടേക്കുള്ള പാതയിൽ ഗതാഗതം ഏറെ നേരം തടസപ്പെട്ടു.
ദേശീയപാത വികസനപ്രവർത്തനങ്ങൾ നടക്കുന്ന ഭാഗമായതിനാൽ റോഡിന്റെ വലതുവശത്ത് കോൺക്രീറ്റ് ബാരിക്കേഡുകൾ അടുക്കിവെച്ചതും ഇടതുവശത്ത് ഹിറ്റാച്ചി ഉൾപ്പെടെയുള്ള നിർമ്മാണ വാഹനങ്ങൾ പാർക്ക് ചെയ്തിരുന്നതുമാണ് അപകടത്തിന് കാരണമായതെന്ന് നാട്ടുകാർ ആരോപിച്ചു. സംഭവത്തിൽ പൊലീസ് അന്വേഷണം ആരംഭിച്ചു.
