മാഡ്രിഡ്: റയല്‍ മാഡ്രിഡ് സൂപ്പര്‍താരം വിനീഷ്യസ് ജൂനിയറെ സ്വന്തമാക്കാനുള്ള ശ്രമങ്ങള്‍ ശക്തമാക്കി പ്രീമിയര്‍ ലീഗ് ചാമ്പ്യന്‍മാരായ ആഴ്സണല്‍. റയലുമായുള്ള കരാര്‍ പുതുക്കല്‍ അനിശ്ചിതത്വത്തിലായ സാഹചര്യത്തില്‍ ബ്രസീലിയന്‍ വിങ്ങറെ ടീമിലെത്തിക്കാന്‍ ക്ലബ് നീക്കം വേഗത്തിലാക്കിയതായി സ്പാനിഷ് മാധ്യമങ്ങള്‍ റിപ്പോര്‍ട്ട് ചെയ്യുന്നു. ആഴ്സണല്‍ പരിശീലകന്‍ മൈക്കല്‍ ആര്‍ട്ടേറ്റ തന്നെയാണ് ട്രാന്‍സ്ഫര്‍ നീക്കങ്ങള്‍ക്ക് നേതൃത്വം നല്‍കുന്നതെന്നാണ് വിവരം. വിനീഷ്യസുമായി അദ്ദേഹം നേരിട്ട് ആശയവിനിമയം നടത്തിയതായും വ്യക്തിപരമായ സന്ദേശം അയച്ചതായും റിപ്പോര്‍ട്ടുകളുണ്ട്.
കഴിഞ്ഞ എട്ട് വര്‍ഷമായി റയല്‍ മാഡ്രിഡിന്റെ പ്രധാന താരങ്ങളിലൊരാളാണ് 26-കാരനായ വിനീഷ്യസ്. ഈ കാലയളവില്‍ മൂന്ന് ലാ ലിഗ കിരീടങ്ങളും രണ്ട് യുവേഫ ചാമ്പ്യന്‍സ് ലീഗ് കിരീടങ്ങളും ഉള്‍പ്പെടെ നിരവധി നേട്ടങ്ങളില്‍ അദ്ദേഹം നിര്‍ണായക പങ്കുവഹിച്ചു. എന്നാല്‍ കരാര്‍ പുതുക്കല്‍ ചര്‍ച്ചകളില്‍ ശമ്പളവുമായി ബന്ധപ്പെട്ട തര്‍ക്കമാണ് നിലവില്‍ പ്രതിസന്ധിക്ക് കാരണം. ഫ്രഞ്ച് സൂപ്പര്‍താരം കിലിയന്‍ എംബാപ്പെയെക്കാള്‍ പ്രതിവര്‍ഷം 10 ദശലക്ഷം യൂറോയിലധികം കുറഞ്ഞ പ്രതിഫലമാണ് റയല്‍ വാഗ്ദാനം ചെയ്തിരിക്കുന്നതെന്നാണ് റിപ്പോര്‍ട്ട്.
ലോകോത്തര താരമെന്ന നിലയില്‍ അര്‍ഹിക്കുന്ന അംഗീകാരം ലഭിക്കുന്നില്ലെന്നാണ് വിനീഷ്യസിന്റെ നിലപാട്. കൂടാതെ നിലവിലെ കരാര്‍ 2027-ല്‍ അവസാനിക്കുമ്പോള്‍ ലഭിക്കേണ്ട ലോയല്‍റ്റി ബോണസ് പുതിയ കരാര്‍ ഒപ്പിടുന്ന സമയത്ത് തന്നെ നല്‍കണമെന്ന ആവശ്യവും താരം മുന്നോട്ടുവെച്ചിട്ടുണ്ട്. എന്നാല്‍ ഈ ആവശ്യങ്ങള്‍ റയല്‍ മാഡ്രിഡ് മാനേജ്‌മെന്റ് അംഗീകരിച്ചിട്ടില്ല. കരാര്‍ പുതുക്കുകയോ അല്ലെങ്കില്‍ ഈ ട്രാന്‍സ്ഫര്‍ ജാലകത്തില്‍ ക്ലബ് വിടുകയോ എന്ന രണ്ട് വഴികളാണ് നിലവില്‍ വിനീഷ്യസിന് മുന്നിലുള്ളത്.
അതേസമയം റയല്‍ വിടാന്‍ താരത്തിന് താല്‍പര്യമില്ലെന്നും, ക്ലബിനും അദ്ദേഹത്തെ നിലനിര്‍ത്താനാണ് ആഗ്രഹമെന്നും റിപ്പോര്‍ട്ടുകള്‍ സൂചിപ്പിക്കുന്നു. എന്നിരുന്നാലും കരാര്‍ പുതുക്കല്‍ പരാജയപ്പെട്ടാല്‍ വമ്പന്‍ ട്രാന്‍സ്ഫര്‍ തുകയ്‌ക്ക് താരത്തെ വില്‍ക്കാനാണ് ക്ലബ് പ്രസിഡന്റ് ഫ്ളോറന്റീനോ പെരസിന്റെ നിലപാട്. വിനീഷ്യസിനെ സ്വന്തമാക്കാന്‍ 137 ദശലക്ഷം പൗണ്ട് (ഏകദേശം 1760 കോടി രൂപ) വരെ മുടക്കാന്‍ ആഴ്സണല്‍ തയ്യാറാണെന്നും റിപ്പോര്‍ട്ടുകളുണ്ട്.
ചാമ്പ്യന്‍സ് ലീഗ് കിരീടമാണ് പുതിയ സീസണിലെ പ്രധാന ലക്ഷ്യമെന്ന് വ്യക്തമാക്കിയ ആഴ്സണല്‍, വിനീഷ്യസിനെ ടീമിന്റെ മുഖ്യ താരമാക്കി പദ്ധതികള്‍ തയ്യാറാക്കുകയാണെന്നാണ് സൂചന. ഇംഗ്ലീഷ് പ്രീമിയര്‍ ലീഗിലും യൂറോപ്യന്‍ ഫുട്‌ബോളിലും ആഴ്സണലിനെ ദീര്‍ഘകാല ശക്തിയാക്കാനുള്ള പദ്ധതിയും ആര്‍ട്ടേറ്റ ബ്രസീല്‍ താരവുമായി പങ്കുവെച്ചതായും സ്പാനിഷ് മാധ്യമങ്ങള്‍ റിപ്പോര്‍ട്ട് ചെയ്യുന്നു.
