ശ്രീനഗർ : ജമ്മു കശ്മീരിൽ പോലീസ് ഓഫീസർക്ക് നേരെ ഭീകരർ വെടിയുതിർത്തു. ആന്റി കറപ്ഷൻ ബ്യൂറോ ഇൻസ്പെക്ടർ ഷെയ്ഖ് ഫിർദോസിന് നേരെയാണ് ആക്രമണം ഉണ്ടായത്. സാരമായി പരിക്കേറ്റ അദ്ദേഹത്തെ ആശുപത്രിയിൽ പ്രവേശിപ്പിച്ചു.
ശ്രീനഗറിലെ ബട്ടമാലൂവിൽ രാത്രിയോടെയായിരുന്നു സംഭവം. മസ്ജിദിൽ നിസ്കരിച്ചതിന് ശേഷം പുറത്തുവന്ന ഫിർദോസിന് നേരെ വാഹനത്തിൽ എത്തിയ ഭീകരർ വെടിയുതിർക്കുകയായിരുന്നു. പ്രാർത്ഥനയ്ക്ക് എത്തിയ മറ്റുള്ളവർ ചേർന്നാണ് അദ്ദേഹത്തെ ആശുപത്രിയിൽ എത്തിച്ചത്.
ഫിർദോസിന്റെ കഴുത്തിലാണ് വെടിയേറ്റത്. അദ്ദേഹം അപകടനില തരണം ചെയ്തതായി അധികൃതർ അറിയിച്ചു. സംഭവത്തിന്റെ പശ്ചാത്തലത്തിൽ മസ്ജിദ് പരിസരത്തെ സുരക്ഷ ശക്തമാക്കി.
