കൊച്ചി: പ്രധാനമന്ത്രി നരേന്ദ്ര മോദിയുടെ സന്ദർശനത്തോടനുബന്ധിച്ച് ദേശീയപാതയിൽ നിയന്ത്രണമേർപ്പെടുത്തി. നാളെയും മറ്റന്നാളുമാണ് നിയന്ത്രണം.
നാളെ പകൽ 2 മുതൽ രാത്രി 8 വരെ ദേശീയ പാത അത്താണി ജംഗ്ഷൻ മുതൽ കാലടി മറ്റൂരിൽ എം.സി റോഡ് വരെ വിമാനത്താവളത്തിന് മുന്നിലൂടെയുള്ള റോഡിൽ ഗതാഗതം പൂർണ്ണമായും നിരോധിച്ചു. വിമാനത്താവളത്തിലേക്ക് യാത്ര ചെയ്യുന്നവർ നേരത്തെ എത്തേണ്ടതാണെന്ന് എറണാകുളം റൂറൽ പോലീസ് അറിയിച്ചു. അങ്കമാലി മുതൽ മുട്ടം വരെയും , എം.സി റോഡിൽ അങ്കമാലി മുതൽ കാലടി വരെയും , എയർപോർട്ട് റോഡിലും ഉച്ചക്ക് 2 മുതൽ രാത്രി 8 വരെ ഗതാഗതത്തിന് നിയന്ത്രണമുണ്ടാകും. ഈ സമയം കണ്ടെയ്നർ, ഗുഡ്സ് വാഹനങ്ങളും അനുവദിക്കില്ല.
അങ്കമാലി- പെരുമ്പാവൂർ റൂട്ടിൽ യാത്ര ചെയ്യുന്നവർ മഞ്ഞപ്ര ,കോടനാട്, വഴിപോകേണ്ടതാണ്. വിമനത്താവള പരിസരത്ത് രണ്ടാം തിയതി വെള്ളിയാഴ്ച രാവിലെ 10 മുതൽ ഉച്ചക്ക് 2 വരെയും ഗതാഗത നിയന്ത്രണം ഉണ്ടാകും.
കൊച്ചി മെട്രോയുടെ രണ്ടാം ഘട്ടത്തിന്റെ തറക്കല്ലിടൽ നിർവഹിക്കാനാണ് പ്രധാനമന്ത്രി നാളെ കൊച്ചിയിലെത്തുന്നത്. കൊച്ചിൻ ഇന്റർനാഷണൽ എയർപോർട്ട് ലിമിറ്റഡിന്റെ എക്സിബിഷൻ സെന്ററിലാണ് ഉദ്ഘാടന പരിപാടികൾ സംഘടിപ്പിക്കുന്നത്. ഗവർണർ ആരിഫ് മുഹമ്മദ് ഖാൻ, മുഖ്യമന്ത്രി പിണറായി വിജയൻ, മേയർ എം അനിൽ കുമാർ, എംപി ഹൈബി ഈഡൻ, ഗതാഗതമന്ത്രി ആന്റണി രാജു, വ്യവസായമന്ത്രി പി രാജീവ് എന്നിവരുടെ സാന്നിധ്യവും ചടങ്ങിലുണ്ടാകും.
