തിരുവനന്തപുരം: ദേശീയപാത വികസനത്തിൽ കേരളത്തിനൊപ്പം നിൽക്കുന്ന കേന്ദ്ര മന്ത്രി നിതിൻ ഗഡ്കരിക്ക് നന്ദി പറഞ്ഞ് മുഖ്യമന്ത്രി പിണറായി വിജയൻ. കേന്ദ്രത്തെയും സംസ്ഥാനത്തെയും തമ്മിൽ തെറ്റിക്കാമെന്ന് ചിലർ മനപ്പായസം ഉണ്ണുകയാണെന്നും മാദ്ധ്യമങ്ങളെ വിമർശിച്ചു കൊണ്ട് മുഖ്യമന്ത്രി പറഞ്ഞു. ഗഡ്കരിയുടെ പ്രസ്താവന ചില മാദ്ധ്യമങ്ങൾ തെറ്റായി പ്രചരിപ്പിച്ചുവെന്നും മുഖ്യമന്ത്രി ആരോപിച്ചു.
സംസ്ഥാനവും കേന്ദ്രവും തമ്മിൽ തർക്കത്തിനിടയാകുമെന്ന് ചില മാദ്ധ്യമങ്ങൾ കരുതി. എന്നാൽ ദേശീയപാത വികസനം അജണ്ടയായി ഏറ്റെടുത്ത് നടപ്പാക്കാൻ സംസ്ഥാന സർക്കാർ തയ്യാറാണ്. കേരളത്തിനായി വ്യക്തിപരമായി താത്പര്യമെടുത്തതിന് കേന്ദ്ര മന്ത്രി നിതിൻ ഗഡ്കരിക്ക് നന്ദി പറയുകയാണെന്നും മുഖ്യമന്ത്രി പിണറായി വിജയൻ പറഞ്ഞു.
വികസന കാര്യങ്ങളിൽ ഒരുമിച്ച് നിൽക്കുന്നതിന് കേരളത്തിന് നന്ദി അറിയിക്കുന്നുവെന്ന് കേന്ദ്ര മന്ത്രി നിതിൻ ഗഡ്കരിയും പറഞ്ഞു. 2025ഓടെ കേരളത്തിലെ റോഡുകൾ അമേരിക്കയിലേതിന് തുല്യമാക്കുമെന്നും അദ്ദേഹം പ്രഖ്യാപിച്ചു. വികസന കാര്യത്തിൽ സംസ്ഥാനത്തിന്റെ മുഖച്ഛായ മാറ്റുമെന്നും കേന്ദ്ര മന്ത്രി വ്യക്തമാക്കി.
