ന്യൂഡൽഹി : മുന്ന് സംസ്ഥാനങ്ങളിലെയും നിയമസഭാ തിരഞ്ഞെടുപ്പുകളെ കുറിച്ച് സംസാരിച്ച് പ്രധാനമന്ത്രി നരേന്ദ്ര മോദി. ജനാധിപത്യത്തിലും ജനാധിപത്യ പ്രവർത്തനങ്ങളിലുമുള്ള ജനങ്ങളുടെ ഉറച്ച വിശ്വാസത്തിന്റെ തെളിവാണ് ബിജെപിയുടെ വിജയമെന്ന് അദ്ദേഹം പറഞ്ഞു.
ത്രിപുരയിലെയും മേഘാലയയിലെയും വിജയത്തെ ചൂണ്ടിക്കാട്ടിയാണ് അദ്ദേഹം ഇക്കാര്യം സൂചിപ്പിച്ചത്. തിരഞ്ഞെടുപ്പ് ഫലങ്ങളിൽ പ്രതിഫലിക്കുന്നത് ജനങ്ങളുടെ ശക്തമായ വിശ്വാസമാണ് എന്ന പ്രധാനമന്ത്രിയുടെ വാക്കുകളിൽ മോദി,മോദി എന്ന് ഉറക്കെ വിളിച്ചുകൊണ്ടാണ് സദസ്സിലുള്ളവർ പ്രതികരണം അറിയിച്ചത്.
മൂന്ന് സംസ്ഥാനങ്ങളിലെയും ബിജെപി പ്രവർത്തകർ നൽകിയ കഠിന പ്രയത്‌നത്തെ അദ്ദേഹം അഭിനന്ദിച്ചു. വടക്കുകിഴക്കൻ മേഖലയിലെ ജനതയോടുള്ള നന്ദി പ്രകടിപ്പിക്കുന്നതിനായി മൊബൈൽ ഫോണിലെ ഫ്‌ളാഷ് ലൈറ്റ് ഓൺ ചെയ്ത് വീശുവാൻ അദ്ദേഹം സദസ്സിനോട് ആവശ്യപ്പെട്ടിരുന്നു.
ത്രിപുരയിൽ 60 സീറ്റുകളിൽ 33-ലും വിജയിച്ചാണ് ബിജെപി അധികാരത്തിലെത്തിയത്. നാഗാലൻഡിൽ 37 സീറ്റുകളിൽ ബിജെപിയും പങ്കാളി എൻഡിപിയും ചേർന്ന് സ്ഥാനമുറപ്പിച്ചിരുന്നു. മുന്ന് സംസ്ഥാനങ്ങളിലും വിജയമുറപ്പിക്കാൻ സാധിച്ചത് കേന്ദ്ര സർക്കാർ മുന്നോട്ട് വച്ച വികസന പദ്ധതികളുടെ അടിസ്ഥാനത്തിലാണെന്ന് പാർട്ടി സൂചിപ്പിച്ചു.
