ന്യൂഡൽഹി: നേപ്പാളുമായുള്ള വികസന പങ്കാളിത്തം വർദ്ധിപ്പിക്കാൻ ഇന്ത്യ പ്രതിജ്ഞാബദ്ധമാണെന്ന് രാഷ്ട്രപതി ദ്രൗപദി മുർമു. നിരവധി സുപ്രധാന പദ്ധതികൾ വേഗത്തിൽ പൂർത്തിയാക്കുന്നതിനും അയൽ രാജ്യവുമായുള്ള വികസന പങ്കാളിത്തം കൂടുതൽ ശക്തമാക്കുന്നതിനുമാണ് ഇന്ത്യ മുൻഗണന നൽകുന്നതെന്ന് രാഷ്ട്രപതി പറഞ്ഞു.
ഇന്ത്യയും നേപ്പാളും തമ്മിലുള്ള പുരാതന സാംസ്കാരിക ബന്ധം ഇരുരാജ്യങ്ങളുടെയും ഉഭയകക്ഷി ബന്ധത്തിന്റെ അടിത്തറയാണ്. ഇത് മറ്റ് മേഖലകളിലും പുരോഗതി കൈവരിക്കാൻ സഹായിക്കും. നേപ്പാൾ പ്രധാനമന്ത്രിയുമായുള്ള കൂടിക്കാഴ്ചയിൽ ഇന്ത്യയുടെയും നേപ്പാളിന്റെയും അതിർത്തി മേഖലയിലെ വിനോദസഞ്ചാരത്തെ പ്രോത്സാഹിപ്പിക്കുന്ന നടപടികളെ കുറിച്ച് ചർച്ച ചെയ്തു. കൂടാതെ, ജനങ്ങൾ തമ്മിലുള്ള സമ്പർക്കവും സാമ്പത്തിക ബന്ധത്തിലെ പുരോഗതിയും ഇരുരാജ്യങ്ങളുടെയും വിനോദസഞ്ചാര മേഖലയെ കൂടുതൽ വിപുലീകരിക്കുമെന്നും രാഷ്ട്രപതി പറഞ്ഞു.
ഇന്ത്യ-നേപ്പാൾ ഉഭയകക്ഷി ബന്ധം വലിയ ഉയരങ്ങളിലേക്ക് കൊണ്ടുപോകുന്നതിനുള്ള ഒരു നല്ല പദ്ധതിയ്ക്കായാണ് രാജ്യം ഉറ്റുനോക്കുന്നത്. ഈ സന്ദർശനം ഇരു രാജ്യങ്ങളും തമ്മിലുള്ള ബന്ധം കൂടുതൽ ദൃഢപ്പെടുത്തുമെന്നും രാഷ്ട്രപതി വ്യക്തമാക്കി.
