ന്യൂഡൽഹി: ഗോത്രവർഗക്കാരുടെയും പിന്നാക്ക വിഭാഗങ്ങളുടെയും ജീവിതം മെച്ചപ്പെടുത്തുന്നതിന് വിദ്യാഭ്യാസം സുപ്രധാന പങ്ക് വഹിക്കുന്നുവെന്ന് രാഷ്ട്രപതി ദ്രൗപദി മുർമു. പിന്നാക്ക വിഭാഗങ്ങളുടെ വികസനത്തിന് വിദ്യാഭ്യാസം നൽകുന്ന പ്രധാന്യത്തെ കുറിച്ച് രാഷ്ട്രപതി ഊന്നിപ്പറഞ്ഞു. മഹാരാഷ്ട്രയിലെ ഗഡ്ചിരോലി ജില്ലയിൽ ഗോണ്ട്വാന സർവകലാശാലയുടെ ബിരുദദാന ചടങ്ങിൽ സംസാരിക്കുകയായിരുന്നു രാഷ്ട്രപതി മുർമു.
വിദ്യാർത്ഥിനികളുടെ നേട്ടങ്ങൾ എന്നും അഭിമാനകരമാണ്. ഇത് മറ്റ് പെൺകുട്ടികൾക്കും മികച്ച മാതൃകയാണ്. ഇവിടുത്തെ വനവാസി കുട്ടികൾക്ക് വിദ്യാഭ്യാസം നൽകുന്നതിനും വിവിധ കോഴ്സുകൾ ആരംഭിക്കുന്നതിനും ഗോണ്ട്വാന സർവകലാശാല മികച്ച പ്രവർത്തനങ്ങളാണ് ചെയ്യുന്നത്. വനവാസി കുട്ടികളെ ഇടയ്ക്കിടെ ഞാൻ കാണുകയും അവരുമായി സംവദിക്കുകയും ചെയ്യും. കുട്ടികൾക്ക് മികച്ച വിദ്യാഭ്യാസം ആവശ്യമാണ്. അവർക്ക് ജീവിതത്തിൽ മുന്നോട്ട് പോകാനുള്ള പ്രതീക്ഷ നാം ഉണ്ടാക്കികൊടുക്കണമെന്നും രാഷ്ട്രപതി പറഞ്ഞു.
എല്ലാവരുമായും ഒന്നിച്ച് പ്രവർത്തിച്ച് ജീവിതത്തിൽ മുന്നേറാൻ വനവാസി കുട്ടികളും പരിശ്രമിക്കണം. ഗോത്രവർഗ സമൂഹത്തിൽ നിന്ന് നമുക്ക് പഠിക്കാൻ ഒരുപാട് കാര്യങ്ങളുണ്ട്. അവർ പ്രകൃതിയുമായി ഇണങ്ങി ജീവിക്കുന്നത് എങ്ങനെയെന്ന് അറിയണം. അവരുടെ ജീവിതത്തിന്റെ ഉന്നമനത്തിനായി നമുക്ക് പ്രവർത്തിക്കണമെന്നും രാഷ്ട്രപതി വ്യക്തമാക്കി. രാഷ്ട്രപതിയായതിന് ശേഷമുള്ള ദ്രൗപദി മുർമുവിന്റെ ആദ്യ മഹാരാഷ്ട്ര സന്ദർശനമാണിത്.
