ഫുട്ബോള് കളിക്കുന്നതിനിടെ പന്ത് പോലീസ് ജീപ്പില് തട്ടി, പിന്നാലെ നടപടി ക്രമങ്ങള് പാലിച്ച് സുരക്ഷാ പരിശോധനയ്ക്ക് പന്തിനെ കസ്റ്റഡിയിലെടുത്ത് പോലീസ്. ഇപ്പോള് എന്തായാലും ഈ സംഭവം വിചിത്രമായി തോന്നില്ല. കാരണം മൈക്കിനെയും ആംപ്ലിഫെയറിനെയും പ്രതിയാക്കി കസ്റ്റഡിയിലെടുത്തതല്ലേ..
എറണാകുളം നെട്ടൂരിലെ ഗ്രൗണ്ടില് കളിച്ച കുട്ടികളുടെ പന്താണ് പനങ്ങാട് പോലീസ് കസ്റ്റഡിയിലെടുത്തത്. വഴിയാത്രക്കാര്ക്ക് അപകടകരമാവുന്ന രീതിയില് കളിച്ചതിനാലാണ് പന്ത് പിടിച്ചെടുത്തതെന്നാണ് ഇവരുടെ വിശദീകരണം.ഇക്കഴിഞ്ഞ വെള്ളിയാഴ്ച വൈകിട്ടാണ് സംഭവം. ഇതിന്റെ വീഡിയോ സോഷ്യല് മീഡിയയില് ഇക്കഴിഞ്ഞ ദിവസങ്ങളിലാണ് വൈറലായത്.
നെട്ടൂര് പ്രാഥമികാരോഗ്യ കേന്ദ്രത്തിന് സമീപത്തെ ഗ്രൗണ്ടിലായിരുന്നു കുട്ടികളുടെയും യുവാക്കളുടെയും ഫുട്ബോള് കളി. ഈ സമയം വാഹന പരിശോധനക്കെത്തിയ പോലീസ് ജീപ്പ് ഗ്രൗണ്ടില് പാര്ക്ക് ചെയ്തു. വാഹനം മാറ്റണമെന്നും അല്ലെങ്കില് ജീപ്പില് പന്ത് കൊള്ളുമെന്നും കുട്ടികള് മുന്നറിയിപ്പ് നല്കി. എന്നാല് പോലീസിനെന്ത് ഗ്രൗണ്ട്…ഫുട്ബോള്…. എന്ന നിലപാടിലായിരുന്നു ഉദ്യോഗസ്ഥര്.
കളിക്കിടെ പന്ത് ജീപ്പിന്റെ ചില്ലില് കൊണ്ടതോടെ നിലമറന്ന പോലീസുകാര് കുട്ടികളുടെ കളി മുടക്കി. നെട്ടൂര് എസ്ഐയുടെ നേതൃത്വത്തിലുള്ള പോലീസ് സംഘം ഫുട്ബോള് കസ്റ്റഡിയിലെടുത്തു. ജീപ്പുമായി സ്റ്റേഷനിലേക്ക് പോയി. ഗ്രൗണ്ടില് കളിച്ചുകൊണ്ടിരുന്ന കുട്ടികള് എതിര്ത്തെങ്കിലും പന്ത് വിട്ടുനല്കിയില്ല. ഗ്രൗണ്ടിന് സമീപമുണ്ടായിരുന്നവര് ഫുട്ബോളിനെ ചൊല്ലി പോലീസും കുട്ടികളും തമ്മിലുള്ള വാക്കുതര്ക്കം ചിത്രീകരിച്ച് സമൂഹമാദ്ധ്യമങ്ങളില് പ്രചരിപ്പിച്ചതോടെ സംഭവം നാടും നാട്ടുകാരുമറിഞ്ഞു. ആകെ നാണക്കേടായി.
വഴിയാത്രക്കാര്ക്ക് അപകടകരമാവുന്ന വിധത്തിലാണ് കുട്ടികള് ഫുട്ബോള് കളിച്ചിരുന്നതെന്നാണ് പനങ്ങാട് പോലീസിന്റെ വിചിത്ര വിശദീകരണം. ഇത് കുട്ടികള് മനസ്സിലാക്കാനാണ് പന്ത് പിടിച്ചെടുത്തതെന്ന് പറഞ്ഞ പോലീസ് നേരത്തെ ലഹരി കേസില് പ്രതിയായ യുവാവും ഗ്രൗണ്ടില് ഉണ്ടായിരുന്നുവെന്നും കുറ്റപ്പെടുത്തി. ഇയാള് മനപൂര്വം പന്ത് പൊലീസ് ജീപ്പിലേക്കടിച്ചതാണോയെന്നും പോലീസ് സംശയിക്കുന്നുണ്ട്. കുട്ടികള് ഫുട്ബോള് കളിക്കുന്നതിന് എതിരല്ലെന്നും എപ്പോള് വേണമെങ്കിലും സ്റ്റേഷനില് നിന്ന് പന്ത് കൈപ്പറ്റാമെന്നുമാണ് ഇപ്പോള് പനങ്ങാട് പോലീസിന്റെ നിലപാട്.
