ന്യൂയോര്ക്ക്: 2030 ഫുട്ബോള് ലോകകപ്പിനായുള്ള യൂറോപ്യന് യോഗ്യതാ മത്സരങ്ങളില് വിപ്ലവകരമായ മാറ്റങ്ങള് പ്രഖ്യാപിച്ച് യുവേഫ. ക്ലബ്ബ് ഫുട്ബോളിലെ ആവേശപ്പോരാട്ടമായ ചാമ്പ്യന്സ് ലീഗിന് സമാനമായി, രണ്ട് തട്ടുകളായുള്ള പുതിയ യോഗ്യതാ സംവിധാനമാണ് നടപ്പിലാക്കാന് പോകുന്നതെന്ന് യുവേഫ അറിയിച്ചു. പുതിയ പരിഷ്കാരം അനുസരിച്ച് യോഗ്യതാ റൗണ്ട് ലീഗ് 1, ലീഗ് 2 എന്നിങ്ങനെ രണ്ട് വിഭാഗങ്ങളായി തിരിക്കും. ഘടന മാറ്റുന്ന 2028/29 യുവേഫ നേഷന്സ് ലീഗിലെ പ്രകടനത്തിന്റെ അടിസ്ഥാനത്തിലായിരിക്കും ടീമുകളെ ഈ ലീഗുകളില് ഉള്പ്പെടുത്തുക.
ലീഗ് ഒന്നില് ആകെ 36 പ്രമുഖ രാജ്യങ്ങള് ഉണ്ടായിരിക്കും. ഇവരെ 12 ടീമുകള് വീതമുള്ള 3 ഗ്രൂപ്പുകളായി തിരിക്കും. ചാമ്പ്യന്സ് ലീഗ് മാതൃകയില് ഓരോ ടീമും വ്യത്യസ്ത പോട്ടുകളില് നിന്നുള്ള ആറ് വ്യത്യസ്ത എതിരാളികള്ക്കെതിരെ ആറ് മത്സരങ്ങള് (ഹോം അല്ലെങ്കില് എവേ) കളിക്കും. ഈ മൂന്ന് ഗ്രൂപ്പുകളില് നിന്നും ഏറ്റവും മികച്ച റാങ്ക് നേടുന്ന ടീമുകള് ലോകകപ്പിന് നേരിട്ട് യോഗ്യത നേടും. ബാക്കിയുള്ള സ്ഥാനങ്ങള് പ്ലേ-ഓഫ് മത്സരങ്ങളിലൂടെ തീരുമാനിക്കും.
ലീഗ് രണ്ടില് റാങ്കിംഗില് പിന്നിലുള്ള മറ്റ് 18 രാജ്യങ്ങളാണ് ഈ ലീഗില് മത്സരിക്കുക. ഇവര്ക്കും ലോകകപ്പിലേക്ക് യോഗ്യത നേടാനുള്ള അവസരമുണ്ടായിരിക്കും. ‘പുതിയ ഫോര്മാറ്റുകള് മത്സരങ്ങളിലെ തുല്യത വര്ദ്ധിപ്പിക്കും. പ്രാധാന്യമില്ലാത്ത മത്സരങ്ങളുടെ എണ്ണം കുറയ്ക്കാനും ആരാധകര്ക്ക് കൂടുതല് ആവേശകരമായ അനുഭവം നല്കാനും ഇത് സഹായിക്കും. അന്താരാഷ്ട്ര കലണ്ടറില് കൂടുതല് ദിവസങ്ങള് കൂട്ടിച്ചേര്ക്കാതെ തന്നെ എല്ലാ ടീമുകള്ക്കും തുല്യമായ യോഗ്യതാ അവസരം ഉറപ്പാക്കാന് ഇതിലൂടെ സാധിക്കും,’ എന്ന് യുവേഫ പ്രസിഡന്റ് അലക്സാണ്ടര് സെഫെറിന് പറഞ്ഞു.
യൂറോപ്യന് പുരുഷ ദേശീയ ടീമുകളുടെ ഫുട്ബോളിന് കൂടുതല് മൂല്യം നല്കാന് ഈ മാറ്റങ്ങള് ഉപകരിക്കുമെന്നും അദ്ദേഹം കൂട്ടിച്ചേര്ത്തു. യോഗ്യതാ മത്സരങ്ങള്ക്ക് പുറമെ നേഷന്സ് ലീഗിന്റെ ഘടനയിലും യുവേഫ മാറ്റങ്ങള് പ്രഖ്യാപിച്ചിട്ടുണ്ട്. നിലവിലെ നാല് ലീഗുകള്ക്ക് പകരം 18 ടീമുകള് വീതമുള്ള മൂന്ന് ഡിവിഷനുകളായി നേഷന്സ് ലീഗ് മാറും. ഓരോ ലീഗിലും ആറ് ടീമുകള് വീതമുള്ള മൂന്ന് ഗ്രൂപ്പുകളുണ്ടാകും.
ഇതില് ടീമുകള് അഞ്ച് വ്യത്യസ്ത എതിരാളികള്ക്കെതിരെ ആറ് മത്സരങ്ങള് കളിക്കും. മറ്റ് പോട്ടുകളിലെ ടീമുകളുമായി ഒരു മത്സരവും (ഹോം അല്ലെങ്കില് എവേ), സ്വന്തം പോട്ടിലെ ടീമുമായി രണ്ട് മത്സരങ്ങളും (ഹോം, എവേ) വീതമായിരിക്കും കളിക്കുക. ക്വാര്ട്ടര് ഫൈനല്, ഫൈനല് ഫോര് പോരാട്ടങ്ങളും പ്രൊമോഷന്/റെലഗേഷന് പ്ലേ-ഓഫുകളും നിലവിലുള്ളതുപോലെ തന്നെ തുടരും.
