ഹൂസ്റ്റണ്: ലോകകപ്പ് കിരീട പ്രതീക്ഷകളുമായി പോര്ച്ചുഗല് ഇന്ന് ആദ്യ പോരാട്ടത്തിനിറങ്ങുന്നു. ആഫ്രിക്കന് ശക്തികളായ കോംഗോയെ നേരിടുന്ന മത്സരത്തില് എല്ലാവരുടെയും കണ്ണുകള് പതിയുന്നത് സൂപ്പര് താരം ക്രിസ്റ്റ്യാനോ റൊണാള്ഡോയിലേക്കാണ്. ഇന്ത്യന് സമയം രാത്രി 10.30-നാണ് മത്സരം. ഈ മത്സരത്തോടെ ലോകകപ്പ് ചരിത്രത്തില് ആറാം തവണ കളിക്കുന്ന അപൂര്വ നേട്ടം റൊണാള്ഡോ സ്വന്തമാക്കും.
ഇതിനൊപ്പം ഇന്നത്തെ മത്സരത്തില് ഗോള് കണ്ടെത്താനായാല് ആറ് ലോകകപ്പുകളിലും ഗോള് നേടുന്ന ആദ്യ ഫുട്ബോളറായി ചരിത്രത്തില് ഇടംപിടിക്കാനും താരത്തിന് അവസരമുണ്ട്. ആദ്യ മത്സരത്തില് തന്നെ ഹാട്രിക്കുമായി തിളങ്ങിയ ലയണല് മെസിയുടെ പ്രകടനത്തിന് പിന്നാലെ റൊണാള്ഡോയും സമാന മികവ് പുറത്തെടുക്കുമോയെന്ന ആകാംക്ഷയിലാണ് ആരാധകര്. പരിശീലകന് റോബര്ട്ടോ മാര്ട്ടിനെസിന്റെ കീഴില് 4-3-3 ഫോര്മേഷനിലാകും പോര്ച്ചുഗല് ഇറങ്ങുമെന്നാണ് സൂചന.
മുന്നേറ്റനിരയില് റൊണാള്ഡോയ്ക്കൊപ്പം പെഡ്രോ നെറ്റോയും റാഫേല് ലിയാവോയും കളിച്ചേക്കും. ബ്രൂണോ ഫെര്ണാണ്ടസ്, വിറ്റീന്യ, ബെര്ണാര്ഡോ സില്വ എന്നിവര് മധ്യനിര നിയന്ത്രിക്കുമ്പോള് പ്രതിരോധത്തില് റൂബന് ഡയസിനും ഗോണ്സാലോയ്ക്കും പ്രധാന ചുമതലയുണ്ടാകും. അതേസമയം, 52 വര്ഷത്തെ ഇടവേളയ്ക്ക് ശേഷമാണ് കോംഗോ ലോകകപ്പ് വേദിയിലെത്തുന്നത്.
സെബാസ്റ്റ്യന് ഡെസാബ്രിയുടെ പരിശീലനത്തിലുള്ള ടീം 4-2-3-1 ശൈലിയിലാണ് ഇറങ്ങാന് സാധ്യത. യോനെ വിസ മുന്നേറ്റം നയിക്കുമ്പോള് തിയോ ബോംഗോണ്ട, മെഷ്യാക് എലിയ, ഗെയില് കകുറ്റ എന്നിവര് ആക്രമണത്തിന് കരുത്തേകും. റൊണാള്ഡോയുടെ ചരിത്രനേട്ടവും പോര്ച്ചുഗലിന്റെ കിരീടയാത്രയും ഒരേസമയം ആരംഭിക്കുന്ന പോരാട്ടമെന്ന നിലയില് ഇന്നത്തെ മത്സരം ലോക ഫുട്ബോള് ആരാധകര് വലിയ ആകാംക്ഷയോടെയാണ് കാത്തിരിക്കുന്നത്.
