ശ്രീനിവാസൻ, വിനീത് ശ്രീനിവാസൻ, ഷൈൻ ടോം ചാക്കോ എന്നീ മുവർ സംഘം ലീഡ് റോളിലെത്തുന്ന കുറുക്കൻ റിലീസിനെത്തുന്നു. വിഢ്ഠി ദിനമായ ഏപ്രിൽ ഒന്നിനായിരുന്നു ചിത്രത്തിന്റെ ഫസ്റ്റ് ലുക്ക് പോസ്റ്റർ അണിയറ പ്രവർത്തകർ പുറത്ത് വിട്ടിരുന്നു. വളരെയധികം പ്രേക്ഷക സ്വീകാര്യതയായിരുന്നു ചിത്രത്തിന്റെ പോസ്റ്ററിന് ലഭിച്ചിരുന്നത്. ഇപ്പോഴിതാ ചിത്രത്തിന്റെ സെക്കൻഡ് ലുക്ക് പോസ്റ്റർ പുറത്തുവിട്ടിരിക്കുകയാണ് ചിത്രത്തിന്റെ അണിയറപ്രവർത്തകർ.
ഇത്തവണ വ്യത്യസ്തമായൊരു പോസ്റ്ററാണ് അണിയറ പ്രവർത്തകർ പുറത്ത് വിട്ടിരിക്കുന്നത്. പോലീസ് വേഷത്തിൽ നിൽക്കുന്ന വിനീത് ശ്രീനിവാസന്റെ വലത് കയ്യിൽ ഷൈൻ ടോം ചാക്കോയുടെ തലയും ഇടത് കയ്യിൽ ശ്രീനിവാസന്റെ തലയും പിടിച്ച് ചിരിച്ചുകൊണ്ട് നിൽക്കുന്ന ചിത്രമാണ് അണിയറ പ്രവർത്തകർ പുറത്ത് വിട്ടിരിക്കുന്നത്. ജയലാൽ ദിവാകരനാണ് ചിത്രത്തിന്റെ സംവിധാനം നിർവഹിക്കുന്നത്. മീശമാധവൻ. മനസ്സിനക്കരെ, ക്രിസ്ത്യൻ ബ്രദേഴ്സ് എന്നിങ്ങനെ മുപ്പതോളം സിനിമകൾ നിർമ്മിച്ച മഹാസുബൈർ വർണ്ണചിത്രയാണ് ചിത്രത്തിന്റെ നിർമ്മാണവും വിതരണവും നിർവഹിക്കുന്നത്.
വളരെ വലിയൊരു താരനിരയാണ് ചിത്രത്തിനൊപ്പമുള്ളത്. ശ്രീനിവാസൻ, വിനീത് ശ്രീനിവാസൻ, ഷൈൻ ടോം ചാക്കോ എന്നിവർക്കൊപ്പം ചിത്രത്തിൽ സുധീർ കരമന, ശ്രീകാന്ത് മുരളി, ദിലീപ് മേനോൻ, അശ്വത് ലാൽ, ശ്രുതി ജയൻ, ഗൗരി നന്ദ, ജോജി ജോൺ, മാളവിക മേനോൻ, മറീന മൈക്കിൾ, അൻസിബാ ഹസ്സൻ, അഞ്ജലി സത്യനാഥ്, അസീസ് നെടുമങ്ങാട്, രമ്യാ സുരേഷ്, ബാലാജി ശർമ്മ എന്നിങ്ങനെ നിരവധി അഭിനേതാക്കളാണ് ചിത്രത്തിലുള്ളത്.
കുറുക്കന്റെ രചന നിർവ്വഹിച്ചിരിക്കുന്നത് മനോജ് റാംസിംഗാണ്. ചിത്രത്തിന്റെ ഛായാഗ്രഹണം നിർവഹിച്ചിരിക്കുന്നത് ഡിബു ജേക്കബാണ്. പുറത്തിറങ്ങിയ രണ്ട് പോസ്റ്ററുകളിൽ നിന്നും ലഭിക്കുന്ന സൂചന ചിത്രം ഒരു മുഴുനീശ കോമഡി ഡ്രാമയെന്നാണ്. ചിത്രം ഏത് ജോണറിൽ ആണെന്നറിയാൻ റിലീസ് വരെ കാത്തിരിക്കണമെന്നായിരുന്നു ചിത്രത്തിന്റെ അണിയറ പ്രവർത്തകർ പറഞ്ഞത്.
