ലക്നൗ: സ്വന്തം വീട്ടിലെത്തുന്ന പ്രതീതിയാണ് ഭാരതം സമ്മാനിക്കുന്നതെന്ന് ഇന്ത്യയുടെ അർജന്റൈൻ അംബാസിഡർ ഡോ. ഹ്യൂഗോ ജാവിയേർ ഗോബി. ശനിയാഴ്ച വാരാണസിയിൽ നടന്ന ജി 20 കൾച്ചർ വർക്കിംഗ് ഗ്രൂപ്പ് മീറ്റിംഗിൽ പങ്കെടുത്തതിന് പിന്നാലെയായിരുന്നു അദ്ദേഹത്തിന്റെ പ്രതികരണം.
ഏറ്റവും മികച്ച ആതിഥേയരാണ് ഇന്ത്യ. ഭാരതത്തിലേക്ക് വന്നാൽ കേവലം സ്വീകരിക്കപ്പെടുക മാത്രമല്ല, സ്വന്തം വീട്ടിലെത്തിയ അനുഭൂതിയാണ് ലഭിക്കുക. ഒരു കുടുംബത്തിലെ അംഗങ്ങളെന്ന പ്രതീതിയാണ് ഇന്ത്യ നൽകുന്നതെന്നും അദ്ദേഹം പ്രതികരിച്ചു. കൂടാതെ വാരാണസിയിൽ ചേർന്ന സാംസ്കാരിക കൂട്ടായ്മ എല്ലാ അർത്ഥത്തിലും വലിയ വിജയമായിരുന്നുവെന്നും അദ്ദേഹം കൂട്ടിച്ചേർത്തു.
അർജന്റീനയുടെ അംബാസിഡർക്ക് പുറമേ, ഇന്ത്യ ബ്രിട്ടീഷ് കൗൺസിലിന്റെ ആർട്സ് ഡയറക്ടർ ജോനാഥൻ കെന്നഡിയും ഭാരതത്തിന്റെ ആതിഥ്യമര്യാദയെ പ്രശംസിച്ചു. വളരെ മനോഹരമായാണ് ഇന്ത്യ ജി-20 അദ്ധ്യക്ഷത വഹിക്കുന്നതെന്നും ഭാരതത്തിലെത്തിയ ഓരോ പ്രതിനിധിയും ഇവിടം ആസ്വദിക്കുന്നുണ്ടെന്നും അദ്ദേഹം പറഞ്ഞു. വാരാണസിയുടെ പ്രത്യേകതകളും വിനോദങ്ങളുമെല്ലാം അടുത്തറിയാൻ കഴിഞ്ഞുവെന്നും കെന്നഡി കൂട്ടിച്ചേർത്തു.
Comments