റിയോ ഡി ജനീറിയോ: വരാനിരിക്കുന്ന ഫിഫ ലോകകപ്പിനൊരുങ്ങുന്ന ബ്രസീല് ക്യാമ്പില് നിന്ന് ആശങ്കാജനകമായ വാര്ത്ത. സൂപ്പര് താരം നെയ്മര്ക്ക് വലത് കാല്വണ്ണയിലെ പേശിക്ക് പരിക്കേറ്റതായും മൂന്നാഴ്ചയോളം താരം വിശ്രമിക്കേണ്ടി വരുമെന്നും ബ്രസീല് ദേശീയ ടീം ഡോക്ടര് റോഡ്രിഗോ ലാസ്മര് സ്ഥിരീകരിച്ചു. ഇതോടെ ലോകകപ്പിലെ ബ്രസീലിന്റെ ആദ്യ പോരാട്ടത്തില് നെയ്മര് കളിക്കുന്ന കാര്യം കടുത്ത അനിശ്ചിതത്വത്തിലായി. മെയ് 17-ന് നടന്ന കൊരിറ്റിബയ്ക്കെതിരെയുള്ള സാന്റോസിന്റെ ലീഗ് മത്സരത്തിനിടെയാണ് നെയ്മര്ക്ക് ആദ്യമായി പരിക്ക് പറ്റുന്നത്. അതിനുശേഷം താരം കളിക്കളത്തില് ഇറങ്ങിയിട്ടില്ല.
‘നെയ്മര് കഴിഞ്ഞ ദിവസം ബ്രസീലിന്റെ പരിശീലന കേന്ദ്രമായ ഗ്രാന്ജ കൊമാരിയില് റിപ്പോര്ട്ട് ചെയ്തിരുന്നു. തുടര്ന്ന് നടത്തിയ മെഡിക്കല് പരിശോധനകളുടെയും എംആര്ഐ സ്കാനിംഗിന്റെയും അടിസ്ഥാനത്തില് താരത്തിന് ഗ്രേഡ് 2 മസില് സ്ട്രെയിന് ഉള്ളതായി കണ്ടെത്തിയിട്ടുണ്ട്. താരം നിലവില് ചികിത്സയിലാണ്. രണ്ടു മുതല് മൂന്നാഴ്ചയ്ക്കുള്ളില് അദ്ദേഹത്തിന് കളിക്കാന് അനുമതി ലഭിക്കുമെന്നാണ് പ്രതീക്ഷിക്കുന്നത് എന്ന് ഡോക്ടര് വ്യക്തമാക്കി.
34-കാരനായ സാന്റോസ് നായകന് നെയ്മര്ക്ക് വരാനിരിക്കുന്ന രണ്ട് സൗഹൃദ മത്സരങ്ങള് പൂര്ണ്ണമായും നഷ്ടമാകും. വരും ഞായറാഴ്ച ബ്രസീലിയയില് പനാമയ്ക്കെതിരെ നടക്കുന്ന മത്സരത്തിലും ജൂണ് 5-ന് ക്ലീവ്ലാന്ഡില് ഈജിപ്തിനെതിരെ നടക്കുന്ന വാം-അപ്പ് മത്സരത്തിലും താരം കളിക്കില്ല. ജൂണ് 13-ന് മെറ്റ്ലൈഫ് സ്റ്റേഡിയത്തില് മൊറോക്കോയ്ക്കെതിരെയാണ് ലോകകപ്പില് ബ്രസീലിന്റെ ആദ്യ മത്സരം. ഈ മത്സരത്തിലും നെയ്മര് ബൂട്ട് കെട്ടാന് സാധ്യത കുറവാണ്. ജൂണ് 20-ന് ഹെയ്റ്റിക്കെതിരെയും ജൂണ് 24-ന് സ്കോട്ട്ലന്ഡിനെതിരെയുമാണ് ഗ്രൂപ്പ് ഘട്ടത്തില് ബ്രസീലിന്റെ മറ്റ് മത്സരങ്ങള്.
‘ഒരു കളിക്കാരനും പരിക്കേല്ക്കാന് ആഗ്രഹിക്കുന്നില്ല. ലോകകപ്പ് പോലൊരു വലിയ ടൂര്ണമെന്റില് എല്ലാവരുടെയും സേവനം ടീമിന് ആവശ്യമാണ്. നെയ്മറുടെ പരിക്ക് വേഗത്തില് ഭേദമാകുന്നുണ്ടെന്ന് ഡോക്ടര് വ്യക്തമാക്കിയിട്ടുണ്ട്. അദ്ദേഹത്തിന്റെ തിരിച്ചുവരവിനായി ഞങ്ങള് കാത്തിരിക്കുകയാണ്,’ ബ്രസീല് മിഡ്ഫീല്ഡര് കാസെമിറോ മാധ്യമങ്ങളോട് പറഞ്ഞു. 79 ഗോളുകളോടെ ബ്രസീലിന്റെ ചരിത്രത്തിലെ ഏറ്റവും ഉയര്ന്ന ഗോള്വേട്ടക്കാരനായ നെയ്മര്, 2023 ഒക്ടോബറിലേറ്റ കടുത്ത എസിഎല് (പരിക്കിന് ശേഷം ഇതുവരെ ദേശീയ ജേഴ്സി അണിഞ്ഞിട്ടില്ല.
എങ്കിലും അമേരിക്ക, കാനഡ, മെക്സിക്കോ രാജ്യങ്ങള് സംയുക്തമായി ആതിഥേയത്വം വഹിക്കുന്ന ഈ ലോകകപ്പിനായുള്ള 26 അംഗ അന്തിമ സ്ക്വാഡില് പരിശീലകന് കാര്ലോ ആന്സലോട്ടി താരത്തെ ഉള്പ്പെടുത്തുകയായിരുന്നു. നെയ്മറുടെ കരിയറിലെ നാലാം ലോകകപ്പാണിത്. കളിക്കാര് 100 ശതമാനം ശാരീരികക്ഷമത കൈവരിച്ചാല് മാത്രമേ ടീമിലേക്ക് പരിഗണിക്കൂ എന്ന നിലപാടുകാരനായ ആന്സലോട്ടി, ഇതിന് മുന്പുള്ള മത്സരങ്ങളിലൊന്നും നെയ്മറെ ടീമിലേക്ക് വിളിച്ചിരുന്നില്ല.
ലോകകപ്പിലെ ആദ്യ മത്സരത്തിന് ഒരു ദിവസം മുന്പ് വരെ പരിക്കേറ്റ കളിക്കാരന് പകരം പുതിയ താരത്തെ ടീമില് ഉള്പ്പെടുത്താന് ഫിഫ നിയമം അനുവദിക്കുന്നുണ്ട്. അതിനാല് വരും ദിവസങ്ങളിലെ നെയ്മറുടെ ആരോഗ്യ പുരോഗതി നോക്കിയാകും ബ്രസീല് മാനേജ്മെന്റിന്റെ അടുത്ത നീക്കങ്ങള്.
